ام المؤمنین عائشہ (رض) کہتی ہیں کہ رسول اللہ ﷺ نے فرمایا : سب سے زیادہ کامل ایمان والا مومن وہ ہے جو ان میں سب سے زیادہ اچھے اخلاق والا ہو، اور جو اپنے بال بچوں پر سب سے زیادہ مہربان ہو ١ ؎۔ امام ترمذی کہتے ہیں : ١ - یہ حدیث صحیح ہے، ٢ - اور میں نہیں جانتا کہ ابوقلابہ نے عائشہ (رض) سے سنا ہے، ٣ - ابوقلابہ نے عائشہ کے رضاعی بھائی عبداللہ بن یزید کے واسطہ سے عائشہ (رض) سے اس حدیث کے علاوہ بھی اور حدیثیں روایت کی ہیں، ٤ - اس باب میں ابوہریرہ اور انس بن مالک (رض) سے بھی احادیث آئی ہیں۔ تخریج دارالدعوہ : تفرد بہ المؤلف (تحفة الأشراف : ١٦١٩٥) ، وانظر مسند احمد (٦/٤٧، ٩٩) (ضعیف) (عائشہ (رض) کی روایت سے اور ” وألطفهم بأهله “ کے اضافہ کے ساتھ یہ روایت ضعیف ہے، کیوں کہ ابو قلابہ اور عائشہ کے درمیان سند میں انقطاع ہے، لیکن پہلے ٹکڑے کے صحیح شواہد موجود ہیں، تفصیل کے لیے دیکھیے : الصحیحة رقم : ٢٨٤ ) وضاحت : ١ ؎ : اس حدیث سے معلوم ہوا کہ ایمان اور حسن اخلاق ایک دوسرے کے لیے لازم ہیں ، یعنی جو اپنے اخلاق میں جس قدر کامل ہوگا اس کا ایمان بھی اتنا ہی کامل ہوگا ، گویا ایمان کامل کے لیے بہتر اخلاق کا حامل ہونا ضروری ہے ، یہ بھی معلوم ہوا کہ اپنے گھر والوں کے لیے جو سب سے زیادہ مہربان ہوگا وہ سب سے بہتر ہے ، اور یہ بھی معلوم ہوا کہ ایک دوسرے کے مقابلہ میں کسی میں کم اور کسی میں زیادہ ایمان پایا جاتا ہے۔ قال الشيخ الألباني : ضعيف الصحيحة تحت الحديث (284) // ضعيف الجامع الصغير (1990) // صحيح وضعيف سنن الترمذي الألباني : حديث نمبر 2612