ام المؤمنین عائشہ (رض) کہتی ہیں کہ عاشوراء ایک ایسا دن تھا کہ جس میں قریش زمانہ جاہلیت میں روزہ رکھتے تھے اور رسول اللہ ﷺ بھی اس دن روزہ رکھتے تھے، جب آپ مدینہ آئے تو اس دن آپ نے روزہ رکھا اور لوگوں کو بھی اس دن روزہ رکھنے کا حکم دیا، لیکن جب رمضان کے روزے فرض کئے گئے تو صرف رمضان ہی کے روزے فرض رہے اور آپ نے عاشوراء کا روزہ ترک کردیا، تو جو چاہے اس دن روزہ رکھے اور جو چاہے نہ رکھے۔ امام ترمذی کہتے ہیں : ١- یہ حدیث صحیح ہے ١ ؎، ٢- اس باب میں ابن مسعود، قیس بن سعد، جابر بن سمرہ، ابن عمر اور معاویہ (رض) سے بھی احادیث آئی ہیں، ٣- اہل علم کا عمل عائشہ (رض) کی حدیث پر ہے، اور یہ حدیث صحیح ہے، یہ لوگ یوم عاشوراء کے روزے کو واجب نہیں سمجھتے، الا یہ کہ جو اس کی اس فضیلت کی وجہ سے جو ذکر کی گئی اس کی رغبت رکھے۔ تخریج دارالدعوہ : تفرد بہ المؤلف (التحفہ : ١٧٠٨٨) (صحیح) وأخرجہ کل من : صحیح البخاری/الصوم ٦٩ (٢٠٠٢) ، وصحیح مسلم/الصیام ١٩ (١١٢٥) ، و سنن ابی داود/ الصیام ٦٤ (٢٤٤٢) ، وط/الصیام ١١ (٣٣) ، وسنن الدارمی/الصوم ٤٦ (١٨٠٣) من غیر ہذا الطریق۔ وضاحت : فائدہ ا ؎ : مولف نے حدیث پر حکم تیسرے فقرے میں لگایا ہے۔ قال الشيخ الألباني : صحيح، صحيح أبي داود (2110) صحيح وضعيف سنن الترمذي الألباني : حديث نمبر 753