رسول اللہ ﷺ کے اونٹوں کی دیکھ بھال کرنے والے ناجیہ خزاعی (رض) کہتے ہیں کہ میں نے عرض کیا : اللہ کے رسول ! جو اونٹ راستے میں مرنے لگیں انہیں میں کیا کروں ؟ آپ نے فرمایا : انہیں نحر (ذبح) کر دو ، پھر ان کی جوتی انہیں کے خون میں لت پت کر دو ، پھر انہیں لوگوں کے لیے چھوڑ دو کہ وہ ان کا گوشت کھائیں ۔ امام ترمذی کہتے ہیں : ١- ناجیہ (رض) کی حدیث حسن صحیح ہے، ٢- اس باب میں ذویب ابو قبیصہ خزاعی (رض) سے بھی روایت ہے، ٣- اہل علم کا اسی پر عمل ہے، وہ کہتے ہیں کہ نفلی ہدی کا جانور جب مرنے لگے تو نہ وہ خود اسے کھائے اور نہ اس کے سفر کے ساتھی کھائیں۔ وہ اسے لوگوں کے لیے چھوڑ دے، کہ وہ اسے کھائیں۔ یہی اس کے لیے کافی ہے۔ یہ شافعی، احمد اور اسحاق بن راہویہ کا قول ہے۔ یہ لوگ کہتے ہیں کہ اگر اس نے اس میں سے کچھ کھالیا تو جتنا اس نے اس میں سے کھایا ہے اسی کے بقدر وہ تاوان دے، ٤- بعض اہل علم کہتے ہیں کہ جب وہ نفلی ہدی کے جانور میں سے کچھ کھالے تو جس نے کھایا وہ اس کا ضامن ہوگا۔ تخریج دارالدعوہ : سنن ابی داود/ الحج ١٩ (١٧٦٢) ، سنن ابن ماجہ/المناسک ١٠١ (٣١٠٦) (تحفة الأشراف : ١١٥٨١) ، موطا امام مالک/الحج ٤٧ (١٤٨) ، مسند احمد (٤/٣٣) ، سنن الدارمی/المناسک ٦٦ (١٩٥٠) (صحیح) قال الشيخ الألباني : صحيح، ابن ماجة (3106) صحيح وضعيف سنن الترمذي الألباني : حديث نمبر 910