Abu Dawood: Hadith 159

مغیرہ بن شعبہ (رض) کہتے ہیں کہ رسول اللہ ﷺ نے وضو کیا اور دونوں جرابوں اور جوتوں پر مسح کیا۔ ابوداؤد کہتے ہیں : اس حدیث کو عبدالرحمٰن بن مہدی نہیں بیان کرتے تھے کیونکہ مغیرہ (رض) سے معروف و مشہور روایت یہی ہے کہ نبی اکرم ﷺ نے دونوں موزوں پر مسح کیا۔ ابوداؤد کہتے ہیں : یہ حدیث ابوموسیٰ اشعری (رض) سے بھی مروی ہے، اور ابوموسیٰ (رض) نے نبی اکرم ﷺ سے روایت کی ہے کہ آپ نے جرابوں پر مسح کیا، مگر اس کی سند نہ متصل ہے اور نہ قوی۔ ابوداؤد کہتے ہیں : علی بن ابی طالب، ابن مسعود، براء بن عازب، انس بن مالک، ابوامامہ، سہل بن سعد اور عمرو بن حریث رضی اللہ عنہم نے جرابوں پر مسح کیا ہے، اور یہ عمر بن خطاب اور ابن عباس رضی اللہ عنہم سے بھی مروی ہے۔ تخریج دارالدعوہ : سنن الترمذی/الطھارة ٧٤ (٩٩) ، سنن النسائی/الطھارة ٩٦ (١٢٣) ، سنن ابن ماجہ/الطھارة ٨٨ (٥٥٩) ، (تحفة الأشراف : ١١٥٣٤) ، وقد أخرجہ : مسند احمد (٤/٢٥٢) (صحیح )