Abu Dawood: Hadith 3185

جابر بن سمرہ (رض) کہتے ہیں ایک شخص بیمار ہوا پھر اس کی موت کی خبر پھیلی تو اس کا پڑوسی رسول اللہ ﷺ کے پاس آیا، اور اس نے آپ سے عرض کیا کہ وہ مرگیا ہے، آپ ﷺ نے پوچھا : تمہیں کیسے معلوم ہوا ؟ ، وہ بولا : میں اسے دیکھ کر آیا ہوں، رسول اللہ ﷺ نے فرمایا : وہ نہیں مرا ہے ، وہ پھر لوٹ گیا، پھر اس کے مرنے کی خبر پھیلی، پھر وہی شخص رسول اللہ ﷺ کے پاس آیا اور عرض کیا : وہ مرگیا ہے، نبی اکرم ﷺ نے فرمایا : وہ نہیں مرا ہے ، تو وہ پھر لوٹ گیا، اس کے بعد پھر اس کے مرنے کی خبر مشہور ہوئی، تو اس کی بیوی نے کہا : تم رسول اللہ ﷺ کے پاس جاؤ اور اس کے مرنے کی آپ کو خبر دو ، اس نے کہا : اللہ کی لعنت ہو اس پر۔ پھر وہ شخص مریض کے پاس گیا تو دیکھا کہ اس نے تیر کے پیکان سے اپنا گلا کاٹ ڈالا ہے، وہ نبی اکرم ﷺ کے پاس گیا اور اس نے آپ کو بتایا کہ وہ مرگیا ہے، آپ ﷺ نے پوچھا : تمہیں کیسے پتا لگا ؟ ، اس نے کہا : میں نے دیکھا ہے اس نے تیر کی پیکان سے اپنا گلا کاٹ لیا ہے، آپ ﷺ نے پوچھا : کیا تم نے خود دیکھا ہے ؟ ، اس نے کہا : ہاں، آپ ﷺ نے فرمایا : تب تو میں اس کی نماز (جنازہ) نہیں پڑھوں گا ۔ تخریج دارالدعوہ : تفرد بہ أبو داود، (تحفة الأشراف : ٢١٦٠) ، وقد أخرجہ : صحیح مسلم/الجنائز ٣٦ (٩٧٨) ، سنن الترمذی/الجنائز ٦٨ (١٠٦٦) ، سنن النسائی/الجنائز ٦٨ (١٩٦٣) ، سنن ابن ماجہ/الجنائز ٣١ (١٥٢٦) ، مسند احمد (٥/٨٧، ٩٢، ٩٤، ٩٦، ٩٧) (صحیح )