Sunan Al Bayhaqi: Hadith 13244

(١٣٢٣٨) (الف) سیدنا زید بن ارقم (رض) فرماتے ہیں کہ نبی (صلی اللہ علیہ وآلہ وسلم) ایک دن کھڑے ہوئے خطبہ دینے لگے، اللہ کی حمدوثنا بیان کی، پھر فرمایا : میں تم میں سے ایک انسان ہوں اور قریب ہے کہ اللہ کا فرشتہ میرے پاس آئے اور میں اس کی بات کو قبول کرلوں (یعنی موت) میں تم میں دو چیزیں چھوڑ کر جا رہا ہوں، ایک اللہ کی کتاب جس میں نور اور ہدایت ہے تم اللہ کی کتاب کو مضبوطی سے پکڑے رکھنا پھر اس پر ابھارا اور رغبت دلائی پھر فرمایا : اور میرے اہل بیت، میں تم کو اپنے اہل بیت کے بارے میں اللہ سے ڈراتا ہوں۔ حصین نے زید سے کہا : آپ کے اہل بیت کون ہیں ؟ کیا آپ کی بیویاں اہل میں سے ہیں ؟ تو انھوں نے فرمایا : بیشک آپ کی بیویاں اہل بیت میں سے ہیں، لیکن آپ کے بعد جن پر صدقہ حرام ہے۔ پوچھا : وہ کون لوگ ہیں ؟ فرمایا : آلِ علی اور آلِ جعفر اور آلِ عباس فرمایا : کیا ان تمام پر صدقہ حرام ہے ؟ تو انھوں نے فرمایا : جی ہاں۔
(ب) حضرت جبیر بن مطعم (رض) رسول اللہ (صلی اللہ علیہ وآلہ وسلم) سے روایت کرتے ہیں کہ نبی (صلی اللہ علیہ وآلہ وسلم) نے فرمایا : بنو مطلب اور بنوہاشم ایک ہی ہیں اور انھیں قرابت داروں کے حصہ سے دیا۔