Sunan Al Bayhaqi: Hadith 14410

(١٤٤٠٤) حضرت عبداللہ بن عباس (رض) فرماتے ہیں کہ صحابہ کا ایک گروہ عرب کے کسی قبیلہ کے پاس سے گزرا۔ ان میں سے ایک شخص ڈسا ہوا تھا تو انھوں نے پوچھا : کیا تمہارے اندر کوئی دم کرنے والا ہے جو ڈسے ہوئے کو دم کر دے ؟ تو ایک شخص نے بکریوں کے عوض دم کردیا، وہ ڈسا ہوا درست ہوگیا۔ جب وہ بکریاں لے کر اپنے ساتھیوں کے پاس آیا تو انھوں نے ناپسند کیا، انھوں نے کہا : تو کتاب اللہ پر اجرت لیتا ہے ؟ پھر واپس آکر انھوں نے رسول اللہ (صلی اللہ علیہ وآلہ وسلم) کو خبر دی تو رسول اللہ (صلی اللہ علیہ وآلہ وسلم) نے اس شخص کو بلا کر پوچھا تو اس نے کہا : اے اللہ کے رسول (صلی اللہ علیہ وآلہ وسلم) ! ہم عرب کے قبائل میں سے کسی کے پاس سے گزر رہے تھے ان میں ایک شخص کو کسی چیز نے ڈس لیا تھا تو انھوں نے پوچھا : تم میں کوئی دم کرنے والا ہے ؟ تو میں نے سورة فاتحہ پڑھ کر دم کردیا وہ صحت مند ہوگیا، تو رسول اللہ (صلی اللہ علیہ وآلہ وسلم) نے فرمایا : اللہ کی کتاب زیادہ حق رکھتی ہے کہ اس کی تعلیم پر اجرت لی جائے۔