Sunan Al Bayhaqi: Hadith 4642

(٤٦٤٢) ابن عمر (رض) فرماتے ہیں کہ نبی (صلی اللہ علیہ وآلہ وسلم) کے دور میں جب کوئی آدمی خواب دیکھتا تو اپنا خواب نبی (صلی اللہ علیہ وآلہ وسلم) کے سامنے بیان کرتا۔ فرماتے ہیں : میری بھی تمنا تھی کہ میں خواب دیکھوں اور نبی (صلی اللہ علیہ وآلہ وسلم) کے سامنے بیان کروں اور میں کنوارہ نوجوان تھا اور مسجد میں سوتا تھا۔ میں نے دیکھا : دو فرشتے میرے پاس آئے، ایک نے کہا : اس کو آگ کی طرف لے چلو ، میں نے کہنا شروع کردیا کہ میں اللہ کی پناہ چاہتا ہوں جہنم سے ۔ پھر ہمیں دوسرا فرشتہ ملا اس نے مجھے کہا : گھبراؤ نہیں وہ مجھے جہنم کی طرف لے کر چلے اور ہم جہنم کے کنارے پر کھڑے تھے۔ اس کے دو منڈیر تھیں جیسے کنوئیں کی ہوتی ہیں، میں نے ان میں مرد دیکھے جن کو میں جانتا تھا۔ صبح کے وقت میں نے اپنا خواب حضرت حفصہ (رض) کو سنایا تو حفصہ (رض) نے نبی (صلی اللہ علیہ وآلہ وسلم) کو سنایا، آپ (صلی اللہ علیہ وآلہ وسلم) نے فرمایا : عبداللہ اچھا آدمی ہے۔ اگر وہ رات کا قیام کرے۔ سالم فرماتے ہیں کہ اس کے بعد عبداللہ بن عمر (رض) رات کو بہت کم سوتے تھے۔