Sunan Al Bayhaqi: Hadith 6017

(٦٠١٧) (الف) ابو عیاش زرقی (رض) فرماتے ہیں کہ ہم نبی (صلی اللہ علیہ وآلہ وسلم) کے ساتھ عسفان نامی جگہ پر تھے تو ظہر کی نماز کا وقت ہوگیا اور خالد بن ولید مشرکین کے سالار تھے۔ نبی (صلی اللہ علیہ وآلہ وسلم) نے صحابہ کو ظہر کی نماز پڑھائی۔ مشرکین کہنے لگے : اس کے بعد والی نماز انھیں اپنے بیٹوں ‘ اموال اور اپنی جانوں سے بھی زیادہ محبوب ہے۔ وہ عصر کی نماز مراد لے رہے تھے تو ظہر وعصر کے درمیان نبی (صلی اللہ علیہ وآلہ وسلم) کے پاس جبرائیل آگئے۔ انھوں نے آپ (صلی اللہ علیہ وآلہ وسلم) کو خبر دی تو یہ آیت نازل ہوئی : { وَإِذَا کُنْتَ فِیہِمْ فَأَقَمْتَ لَہُمُ الصَّلاَۃَ فَلْتَقُمْ طَائِفَۃٌ مِنْہُمْ مَعَکَ وَلْیَأْخُذُوا أَسْلِحَتَہُمْ } [النساء : ١٠٢] جب آپ ان میں موجود ہوں تو ان کے لیے نماز قائم کریں اور ایک گروہ ان میں سے آپ (صلی اللہ علیہ وآلہ وسلم) کے ساتھ کھڑا ہو اور وہ اپنے اسلحہکو پکڑے ہوئے ہو۔
نماز کا وقت ہوا تو نبی (صلی اللہ علیہ وآلہ وسلم) نے دو صفیں بنائیں اور صحابہ کے پاس اسلحہ موجود تھا۔ آپ (صلی اللہ علیہ وآلہ وسلم) نے اللہ اکبر کہا اور دشمن نبی (صلی اللہ علیہ وآلہ وسلم) کے سامنے تھا۔ ان سب نے اللہ اکبر کہا اور سب نے رکوع کیا۔ پھر نبی (صلی اللہ علیہ وآلہ وسلم) اور وہ صف جو آپ (صلی اللہ علیہ وآلہ وسلم) سے ملی ہوئی تھی سب نے سجدہ کیا اور دوسری صف کھڑی رہی، وہ پہرہ دے رہے تھے۔ جب نبی (صلی اللہ علیہ وآلہ وسلم) فارغ ہوئے اور دوسری رکعت کے لیے کھڑے ہوئے تو پھر دوسروں نے سجدہ کیا۔ پھر یہ دوسری صف والے پہلی صف کی جگہ اور پہلی صف والے دوسری صف والوں کی جگہ چلے گئے۔ آپ (صلی اللہ علیہ وآلہ وسلم) نے ان کو دوسری رکعت پڑھائی۔ ان سب نے رکوع کیا، پھر نبی (صلی اللہ علیہ وآلہ وسلم) اور وہ صف جو آپ (صلی اللہ علیہ وآلہ وسلم) کے ساتھ ملی ہوئی تھی نے سجدہ کیا اور دوسرے کھڑے پہرہ دیتے رہے۔ پھر جب وہ فارغ ہوئے تو ان لوگوں نے سجدہ کیا، پھر سول اللہ (صلی اللہ علیہ وآلہ وسلم) نے سلام پھیرا۔
(ب) ابو عیاش کہتے ہیں کہ نبی (صلی اللہ علیہ وآلہ وسلم) نے یہ نماز دو مرتبہ پڑھائی ۔ ایک مرتبہ عسفان اور دوسری مرتبہ بنو سلیم کی زمین میں۔