Sunan Al Bayhaqi: Hadith 6444

(٦٤٤٤) انس بن مالک (رض) بیان کرتے ہیں : اہل مدینہ کو قحط نے آلیا۔ ایک مرتبہ آپ (صلی اللہ علیہ وآلہ وسلم) ہمیں جمعہ کا خطبہ دے رہے تھے تو ایک آدمی کھڑا ہو اور کہنے لگا کہ مال مویشی اور بکریاں ہلاک ہوگئیں ۔ سو آپ اللہ سے دعا کریں کہ وہ ہمیں پانی پلائے تو آپ (صلی اللہ علیہ وآلہ وسلم) نے اپنے ہاتھ پھیلائے اور دعا کی۔ انس (رض) کہتے ہیں : اس وقت آسمان شیشے کی مانند صاف تھا ، ہوا چلی اور اس نے بادل پیدا کیے اور جمع کیے۔ پھر آسمان نے اپنے پرنالے کھول دیے تو ہم پانی میں بھیگتے ہوئے نکلے یہاں تک کہ ہم اپنے گھروں میں پہنچے اور آئندہ جمعہ تک بارش ہوتی رہی۔ پھر وہی آدمی یا کوئی اور آدمی کھڑا ہوا اور اس نے کہا : اے اللہ کے رسول ! گھر گرپڑے ہیں اللہ تعالیٰ سے دعا کیجیے، وہ بارش روک لے تو رسول مکرم (صلی اللہ علیہ وآلہ وسلم) مسکرا دیے اور آپ (صلی اللہ علیہ وآلہ وسلم) نے کہا :” اے اللہ ! ہمارے ارد گرد لے جا، ہم پر نہ برسا۔ “ انس (رض) کہتے ہیں : میں نے بادلوں کو دیکھا، وہ مدینے کے ارد گرد کمان کی طرح پھیل گئے۔