Sunan Al Bayhaqi: Hadith 659

(٦٦٠) سیدنا جابر بن عبداللہ (رض) سے روایت ہے کہ رسول اللہ (صلی اللہ علیہ وآلہ وسلم) بازار میں بلند جگہ سے داخل ہوئے اور لوگ دونوں طرف تھے۔ آپ (صلی اللہ علیہ وآلہ وسلم) بکری کے مرے ہوئے بچے کے پاس سے گزرے تو اس کو کان سے پکڑا، پھر فرمایا : تم میں سے کون پسند کرتا ہے کہ اس کو ایک درہم میں لے لے ؟ انھوں نے کہا : ہم پسند نہیں کرتے کہ ہم اس میں سے کوئی چیز لیں اور ہم اس کا کیا کریں گے ؟ آپ (صلی اللہ علیہ وآلہ وسلم) فرمایا : ” کیا تم پسند کرتے ہو کہ یہ تمہارے لیے ہو ؟ انھوں نے کہا : اللہ کی قسم ! اگر یہ زندہ ہوتا تب بھی اس میں عیب تھا اس لیے کہ وہ بچہ ہے تو اب اس کو کس طرح لیں جب کہ وہ مردہ ہے ؟ آپ (صلی اللہ علیہ وآلہ وسلم) نے فرمایا : اللہ کی قسم ! دنیا اللہ کے نزدیک اس سے زیادہ ذلیل تر ہے۔