(١١٠٩٥) حضرت عائشہ (رض) فرماتی ہیں رسول اللہ (صلی اللہ علیہ وآلہ وسلم) نے ایک اعرابی سے ایک وسق عجوہ کھجور کے عوض ایک اونٹ خریدا، آپ (صلی اللہ علیہ وآلہ وسلم) نے گھر سے کھجور کا پتا کرایا تو گھر میں کچھ نہ تھا، آپ نے اعرابی کو بتایا کہ کھجور فی الحال نہیں ملی۔ اعرابی چیخ پڑا، ہائے دھوکا ! صحابہ کرام نے اسے جواب دیتے ہوئے کہا : اے اللہ کے دشمن ! تو دھوکے باز ہے۔ رسول اللہ (صلی اللہ علیہ وآلہ وسلم) نے فرمایا : اسے چھوڑدو جس نے کچھ لینا ہوتا ہے وہ ایسی باتیں کرتا ہے، رسول اللہ (صلی اللہ علیہ وآلہ وسلم) نے خولہ بنت حکیم کی طرف اپنا ایک آدمی بھیجا اور اس کے ساتھ اعرابی کو بھی روانہ کردیا، آپ نے اپنے قاصد سے کہا کہ خولہ کو کہنا : میں نے یہ اونٹ خریدا ہے، اعرابی سے ایک وسق عجوہ کھجور کے عوض۔ میرے گھر میں کھجور نہیں ملی میری طرف سے اس اعرابی کو سلف کے طور پر ایک وسق عجوہ کھجور دے دو ۔ چنانچہ جب اعرابی نے اپنا حق وصول کرلیا تو آپ کے پاس لوٹا، رسول اللہ (صلی اللہ علیہ وآلہ وسلم) نے پوچھا : کھجور مل گئی ؟ اس نے کہا : جی ہاں ! آپ نے تو پورا پورا وزن دیا ہے۔ رسول اللہ (صلی اللہ علیہ وآلہ وسلم) نے فرمایا : وہی بہترین لوگ ہوتے ہیں جو پوراوعدہ نبھاتے ہیں اور پورا وزن دیتے ہیں۔