(١١٠٩٦) حضرت عبداللہ محاری فرماتی ہیں : میں ذی المجاز میں اپنی تجارت میں مشغول تھا کہ میں نے رسول اللہ (صلی اللہ علیہ وآلہ وسلم) کو گزرتے ہوئے دیکھا ، آپ نے سرخ حُلّہ پہنا ہواتھا، میں نے آپ کو فرماتے ہوئے سنا : اے لوگو ! لاالہ الاّ اللہ کہوتو فلاح پاجاؤ گے اور ایک آدمی آپ کے پیچھے آپ کو پتھر مار رہا تھا جس سے آپ کے ٹخنوں سے خون بہہ رہا تھا ، وہ کہہ رہا تھا : اے لوگو ! اس کی بات نہ ماننا یہ جھوٹا ہے۔ میں نے کہا : یہ کون ہے ؟ مجھے بتایا گیا کہ یہ بنو مطلب کا جوان ہے، میں نے کہا : جو پتھر مار رہا ہے وہ کون ہے ؟ کہا گیا : وہ اس کا چچا عبدالعزیٰ ابو لھب بن عبدالمطلب ہے، چنانچہ جب اللہ تعالیٰ نے اسلام غالب کردیا تو ہم رندہ سے نکلے اور ہمارے ساتھ ایک عورت تھی۔ ہم نے مدینہ کے قریب پڑاؤڈالا، ہم ابھی بیٹھے ہوئے تھے کہ ہمارے پاس ایک آدمی آیا اس نے چادر پہنی ہوئی تھی، اس نے ہمیں سلام کہا ۔ پھر اس نے کہا : کہاں سے آئے ہو ؟ ہم نے کہا : رندہ سے اور ہمارے پاس سرخ اونٹ ہے تو اس نے کہا : وہ مجھے بیچتے ہو ؟ ہم نے کہا : ہاں ۔ اس نے کہا : کتنے کا ؟ ہم نے کہا : ایک صاع کھجور کے عوض۔ اس نے کہا : ٹھیک ہے میں لیتا ہوں، چنانچہ اس نے کھجوریں دیے بغیر اونٹ کی مہار تھام کر روانہ ہوگیا اور مدینہ کی دیواروں اور باغوں میں چھپ گیا۔ ہم نے ایک دوسرے کو کہا : تم میں سے کوئی اسے جانتا ہے ، کوئی بھی نہیں جانتا تھا۔ پھر ہم ایک دوسرے کو ملامت کرنے لگے جسے جانتا تک نہیں اسے اونٹ پکڑادیا، ہمارے پاس جو عورت تھی۔ اس نے کہا : کیوں ایک دوسرے کو ملامت کر رہے ہو ؟ ہم نے ایک ایسے آدمی کا چہرہ دیکھا ہے جو تم سے کبھی دھوکا نہیں کریگا، میں نے کسی چیز کو چودھویں کے چاند جیسا نہیں دیکھاسوائے اس چہرے کے۔ چنانچہ جب شام ہوئی تو ہمارے پاس ایک آدمی آیا اور اس نے کہا : اسلام علیکم و رحمۃ اللہ وبرکاتہ، کیا آپ لوگ رندہ سے آئے ہیں ؟ ہم نے کہا : جی جناب ! اس نے کہا : میں تمہاری طرف رسول اللہ (صلی اللہ علیہ وآلہ وسلم) کا قاصد ہوں۔ وہ کہہ رہے ہیں کہ آپ یہ کھجوریں پہلے سیر ہو کر کھا لیں، پھر ماپ لیں اور پورا وزن ماپ لیں، چنانچہ ہم نے وہ کھجوریں کھائیں، جب سیر ہوگئے تو ہم نے ماپ لیا، پھر ہم صبح مدینہ روانہ ہوئے، ہم نے دیکھا کہ اللہ کے رسول منبر پر لوگوں کو خطبہ دے رہے ہیں اور میں نے سنا، آپ کہہ رہے تھے : دینے والااونچا ہوتا ہے۔ اپنے اہل و عیال میں سے ماں باپ ، بہن بھائی اور اس کے بعد قریبی رشتہ داروں کو مقدم رکھو اور پہلے انھیں دو ، وہاں پر ایک انصاری صحابی تھا، اس نے کہا : اے اللہ کے رسول ! یہ بنو ثعلبہ ہیں انھوں نے جاہلیت میں فلاں کو قتل کیا تھا، آپ ہمیں اس کا بدلہ دلوادیں، رسول اللہ (صلی اللہ علیہ وآلہ وسلم) نے اپنے دونوں ہاتھ اٹھائے حتیٰ کہ میں نے آپ کے بغل کی سفیدی دیکھی، پھر آپ نے فرمایا : ماں اولاد پر زیادتی نہ کرے اور اولاد ماں پر زیادتی نہ کرے ۔