(١٢٤٤٩) حضرت شعبی (رح) سے روایت ہے کہ انھیں بیڑیوں میں جکڑ کر حجاج بن یوسف کے پاس لایا گیا، جب وہ محل کے دروازے کے پاس پہنچے تو کہتے ہیں کہ مجھے یزید بن ابو مسلم ملے تو انھوں نے کہا : ” انا للہ “ اے شعبی ! تو علم کا پہاڑ ہے اور آج تیرا کوئی سفارشی نہیں، تو اپنے خلاف شرک اور نفاق کا اقرار کرتے ہوئے امیر سے پناہ مانگ تو تو آزادی سے ہم کنار ہوگا، پھر مجھے محمد بن حجاج ملے اور یزید بن ابو مسلم جیسی بات کی، جب میں حجاج کے پاس پہنچا تو اس نے کہا : اے شعبی ! آپ ان لوگوں میں سے ہو جنہوں نے بڑی شد ومد کے ساتھ ہمارے خلاف خروج کیا ہے تو میں نے کہا : اللہ تعالیٰ امیر کی اصلاح فرمائے، ہمیں ناپسندیدہ جگہ پر لائے، جہاں مشکلات ہیں، راستہ تنگ ہوگیا ہے، نیند چھین لی گئی اور ہم مسلسل خوف ہراس میں ہیں اور ہم ایسی رسوائی میں واقع ہوچکے ہیں کہ جہاں نیکوکار متقی نہیں بن سکتے اور فاجر قوی نہیں ہوسکتے تو حجاج نے کہا : تو نے سچ کہا، اللہ کی قسم ! وہ ہم پر بغاوت کر کے نیکوکار نہیں بن گئے اور نہ وہ فاجر بن کر ہم پر قوی ہوئے۔ وہ دونوں بزرگ چلے گئے، پھر اسے (حجاج کو) علم میراث کے مسئلے میں میری ضرورت پڑی تو میں آیا، اس نے کہا : تو ماں، بہن اور دادا کے (حصوں کے) متعلق کیا کہتا ہے ؟ میں نے کہا : اس میں پانچ اصحاب رسول (صلی اللہ علیہ وآلہ وسلم) کا اختلاف ہے اور وہ عبداللہ بن عباس، زید، عثمان، علی اور عبداللہ بن مسعود (رض) ہیں۔ اگر وہ (اصحاب الفرائض) جماعت ہیں تو ابن عباس (رض) کہتے ہیں : دادا باپ کے قائم مقام (باپ والے حصے) ماں کو تین، دادا کو چار اور بہن کو دو حصے دیے ہیں۔ اس نے کہا : امیرالمومنین عثمان (رض) کیا کہتے ہیں ؟ میں نے کہا : انھوں نے (تینوں کو) تین حصے دیے ہیں اس نے کہا : ابن مسعود اس کے متعلق کیا کہتے ہیں ؟ میں نے کہا : انھوں نے چھ حصے کیے بہن کو تین، دادا کو دو اور ماں کو ایک حصہ، اس نے کہا : اس مسئلہ کے متعلق ابوتراب سیدنا علی (رض) کا کیا موقف ہے ؟ میں نے کہا : انھوں نے جو حصے کیے، بہن کو تین، ماں کو دو ، دادا کو ایک حصہ دیا لمبی حدیث ہے۔