(١٣٠٤٤) ابن شہاب سے روایت ہے کہ عروہ کو گمان ہے کہ مروان بن حکم اور مسور بن مخرمہ نے خبر دی کہ رسول اللہ (صلی اللہ علیہ وآلہ وسلم) ہوازان کا وفد آیا تو کھڑے ہوئے۔ انھوں نے سوال کیا کہ ان پر ان کے اموال اور ان کی عورتوں کو لوٹا دیا جائے۔ رسول اللہ (صلی اللہ علیہ وآلہ وسلم) نے ان سے کہا : جیسا کہ تم دیکھ رہے ہو میرے ساتھ کتنے اور لوگ ہیں اور سچی بات مجھے زیادہ محبوب ہے، اس لیے تم ایک چیز پسند کرلو مال یا قیدی۔ میں نے تمہاری وجہ سے تاخیر کی ہے۔ رسول اللہ (صلی اللہ علیہ وآلہ وسلم) نے طائف سے واپس ہو کر دس دن ان کا انتظار کیا تھا، جب ان پر واضح ہوگیا کہ رسول اللہ (صلی اللہ علیہ وآلہ وسلم) ان پر ایک چیز واپس کریں گے تو انھوں نے کہا : ہم اپنے قیدیوں کی واپسی چاہتے ہیں، چنانچہ رسول اللہ (صلی اللہ علیہ وآلہ وسلم) نے مسلمانوں کو خطاب کیا، اللہ کی ثنا بیان کی، پھر فرمایا : امابعد ! تمہارے بھائی توبہ کر کے ہمارے پاس آئے ہیں، مسلمان ہو کر اور میری رائے ہے کہ ان کے قیدی واپس کردیے جائیں۔ اس لیے جو شخص اپنی خوشی سے واپس کرنا چاہے وہ واپس کر دے۔ یہ بہتر ہے اور جو اپنا حصہ نہ چھوڑنا چاہیں، ان کا حق قائم رہے گا، وہ یوں کرلیں کہ اس کے بعد جو سب سے پہلے اللہ ہمیں غنیمت عطا فرمائے گا، اس میں سے ہم ان کو اس کا بدلہ دے دیں گے تو وہ ان کے قیدی واپس کردیں۔ تمام صحابہ نے کہا : اے اللہ کے رسول ! ہم خوشی سے واپس کرنا چاہتے ہیں، لیکن حضور (صلی اللہ علیہ وآلہ وسلم) نے فرمایا : اس طرح ہمیں علم نہیں ہوگا کہ کس نے اپنی خوشی سے واپس کیا ہے اور کس نے نہیں۔ اس لیے سب لوگ جائیں اور تمہارے بڑے لوگ تمہارا فیصلہ ہمارے پاس لائیں، چنانچہ سب واپس آگئے، ان کے بڑوں نے ان سے گفتگو کی۔ پھر وہ رسول اللہ (صلی اللہ علیہ وآلہ وسلم) کے پاس آئے اور عرض کیا، سب نے خوشی سے اجازت دے دی ہے یہی وہ حدیث ہے جو قبیلہ ہوازن کے قیدیوں کے متعلق ہمیں پہنچی ہے۔