(١٣٢١٠) حضرت ابوسعید خدری (رض) فرماتے ہیں کہ میرے والد جنگِ احد میں شہید ہوگئے اور ہمارے لیے کوئی ترکہ نہ چھوڑا۔ ہم سخت ضرورت مند ہوگئے تو میری ماں نے مجھ سے کہا : اے بیٹے ! رسول اللہ (صلی اللہ علیہ وآلہ وسلم) کے پاس جاؤ اور ہمارے لیے کچھ مانگ لاؤ۔ میں آپ کے پاس آیا اور سلام کیا اور بیٹھ گیا، آپ (صلی اللہ علیہ وآلہ وسلم) اپنے صحابہ (رض) میں بیٹھے ہوئے تھے، پھر میری جانب متوجہ ہو کر کہا : جو بے پروا ہوگیا اللہ تعالیٰ اس کو بے پروا کر دے گا، جو پاک دامن رہا اللہ تعالیٰ اس کی حفاظت فرمائے گا اور جس نے ہاتھ پھیلایا وہ اس کو اس کی طرف لگا دے ، ابوسعید (رض) کہتے ہیں : میں نے سوچا آپ (صلی اللہ علیہ وآلہ وسلم) کی مراد میں ہوں ‘ میں واپس آگیا اور کوئی بات نہ کی، میری ماں نے پوچھا تو میں نے ساری خبر دے دی۔ ہمیں آپ نے صبر کی تلقین کی۔ اللہ تعالیٰ نے ہمیں رزق دیا یہاں تک کہ ہم پہلے سے زیادہ ضرورت مند ہوگئے، میری ماں نے مجھے رسول اللہ (صلی اللہ علیہ وآلہ وسلم) کے پاس کچھ لینے کے لیے بھیجا، میں آیا، آپ (صلی اللہ علیہ وآلہ وسلم) صحابہ (رض) کی مجلس میں تھے۔ میں نے سلام کہا اور بیٹھ گیا، آپ میری طرف متوجہ ہوئے اور پہلے والی بات کی جس میں یہ الفاظ زیادہ تھے کہ جس بندے نے سوال کیا حالانکہ اس کے پاس چالیس درہم ہیں تو وہ چمٹ کر سوال کرنے والا ہے (یعنی چمٹنے والا ہے) میں نے اپنے دل میں سوچا، میرے پاس یاقوت ہے وہ اوقیہ سے زیادہ ہے۔ اوقیہ چالیس درہم کا ہوتا ہے، میں واپس آگیا اور آپ (صلی اللہ علیہ وآلہ وسلم) سے سوال نہیں کیا، عبید کہتے ہیں یاقوت اونٹنی ہے۔