(١٦٠١٥) ابو رافع فرماتے ہیں کہ ابو لؤلؤ مغیرہ بن شعبہ (رض) کا غلام تھا، پھر مکمل قصہ بیان فرمایا اور فرمایا کہ اس نے دو دھاری خنجر تیار کیا، اسے زہر آلود کیا۔ فرماتے ہیں : حضرت عمر نے تکبیر کہی اور حضرت عمر اقامت کے بعد کچھ بولتے، پھر تکبیر کہا کرتے تھے۔ آپ کہنے لگے : اپنی صفیں سیدھی کرلو۔ تو یہ وہیں صف میں کھڑا تھا، جب آپ نے نمازِ فجر کے لیے تکبیر کہی تو اس نے آپ پر حملہ کردیا آپ کے کندھے اور آپ کے پہلو کو زخمی کردیا تو حضرت عمر گرپڑے، اس نے ١٣ تیرہ لوگوں کو اور زخمی کیا جن میں سے ٦ چھ فوت ہوگئے۔ حضرت عمر کو اٹھایا گیا اور لے کر چلے گئے۔ پھر لمبی حدیث بیان کی۔ فرماتے ہیں : پھر حضرت عمر نے کچھ پینے کے لیے منگایا تاکہ اپنے زخم کی گہرائی دیکھیں۔ نبیذ لایا گیا تو وہ آپ کے زخم سے نکل گیا۔ پتہ نہیں وہ نبیذ تھا یا آپ کا خون۔ پھر دودھ منگایا وہ پیا تو وہ بھی آپ کے زخم سے بہہ کر نکل گیا۔ تو لوگ کہنے لگے : اے امیر المٔومنین ! فکر نہ کریں، کچھ نہیں ہوتا تو آپ نے فرمایا : اگر قتل میں کوئی حرج ہے تو میں تو قتل کردیا گیا ہوں۔