(١٦٦٦٩) ابن عجرہ انصاری فرماتے ہیں کہ ہم مسجد میں ٩ آدمی تھے۔ نبی (صلی اللہ علیہ وآلہ وسلم) آئے اور فرمایا : کیا تم سنتے ہو کیا سنتے ہو ؟ تین مرتبہ فرمایا، پھر فرمایا : عنقریب تم میں ایسے امراء ہوں گے کہ جو ان کے پاس گیا ان کی تصدیق کی ۔۔۔ آگے سابقہ روایت۔
سہل بن سعد فرماتے ہیں کہ نبی (صلی اللہ علیہ وآلہ وسلم) نے اپنے صحابہ کو فرمایا : تم کیسے ہو گے جب برے لوگوں میں تم رہو گے، تمہاری امانتیں اور عہد ضائع ہوجائیں گے اور تم اس طرح ہو گے ؟ پھر اپنی انگلیاں آپس میں داخل کیں۔ پوچھا : یا رسول اللہ (صلی اللہ علیہ وآلہ وسلم) ! اس وقت ہم کیا کریں ؟ فرمایا : جو تمہیں اچھی لگے، وہ لے لینا اور جو بری لگے چھوڑ دینا۔ پھر عبداللہ بن عمرو بن عاص نے خود سوال کیا کہ مجھی کیا حکم دیتے ہیں کہ میں اس وقت کیا کروں ؟ فرمایا : میں تمہیں اللہ سے ڈرنے اور اپنے نفس کو قابو کرنے اور عام امور سے اپنے آپ کو بچانے کا مشورہ دیتا ہوں۔