(١٦٨٣٤) حضرت ابوہریرہ (رض) فرماتے ہیں کہ ہم خیبر میں نبی (صلی اللہ علیہ وآلہ وسلم) کے ساتھ حاضر ہوئے تو اسلام کا دعویٰ کرنے والے ایک شخص کے بارے میں آپ نے فرمایا : یہ آگ میں ہے، جب جنگ شروع ہوئی تو وہ بڑی جوانمردی سے لڑا تو لوگوں نے اس کی جرات دیکھ کر نبی (صلی اللہ علیہ وآلہ وسلم) سے عرض کیا : یا رسول اللہ ! جس کے بارے میں آپ نے فرمایا تھا کہ وہ جہنمی ہے وہ تو بڑی بہادری سے لڑا ہے اور بہت زخمی ہے تو آپ نے فرمایا : وہ جہنمی ہے تو لوگ شک میں پڑگئے تو انھوں نے دیکھا : اس شخص نے جو سخت زخمی تھا، اپنا تیر نکالا اور اس سے اپنے آپ کو قتل کردیا تو مسلمان لوگ نبی (صلی اللہ علیہ وآلہ وسلم) کے پاس جلدی سے آئے اور کہنے لگے : اللہ نے آپ کی بات سچ ثابت کردی یا رسول اللہ ! اللہ نے اسے آزمایا، اس نے اپنے آپ کو قتل کردیا تو آپ (صلی اللہ علیہ وآلہ وسلم) نے حضرت بلال کو حکم دیا کہ لوگوں میں اعلان کر دو کہ جنت میں صرف مومن جائے گا اور اللہ نے اپنے دین کی مدد ایک فاجر آدمی کے ذریعے فرمائی۔