(١٦٩٢٩) ابن عمر فرماتے ہیں کہ یہود میں سے ایک مرد و عورت نے زنا کرلیا۔ وہ نبی (صلی اللہ علیہ وآلہ وسلم) کے پاس آگئے تو نبی (صلی اللہ علیہ وآلہ وسلم) نے پوچھا : تم توراۃ میں اس کا کیا حکم پاتے ہو ؟ کہنے لگے کہ انھیں ذلیل کریں اور کوڑے ماریں تو عبداللہ بنسلام فرمانے لگے : جھوٹ بولتے ہو، توراۃ لے آؤ۔ اس میں رجم کا حکم ہے، وہ توراۃ لے آئے اور ایک شخص آیت الرجم پر ہاتھ رکھ کر اس سے پہلے اور بعد میں پڑھنے لگا تو ابن سلام نے فرمایا : اپنا ہاتھ اٹھاؤ، جب ہاتھ اٹھایا تو وہاں رجم کی آیت تھی تو لوگ کہنے لگے : سچ ہے اے محمد ! رجم کی آیت موجود ہے تو نبی (صلی اللہ علیہ وآلہ وسلم) نے رجم کا حکم دے دیا، انھیں رجم کیا گیا۔ عبداللہ کہتے ہیں : میں نے دیکھا کہ وہ شخص عورت پر جھک رہا تھا تاکہ اسے پتھروں سے بچالے۔