(١٦٩٩٨) ابوہریرہ (رض) فرماتے ہیں کہ ماعز نے نبی (صلی اللہ علیہ وآلہ وسلم) کے سامنے پانچ مرتبہ زنا کا اعتراف کیا تو نبی (صلی اللہ علیہ وآلہ وسلم) نے پوچھا : جانتے ہو زنا کیا ہوتا ہے ؟ کہا : ہاں کہ جس طرح آدمی بیوی کے پاس حلال طریقے سے آتا ہے تو غیر بیوی کے ساتھ ویسا حرام طریقے سے کرے۔ تو فرمایا : کیا چاہتے ہو ؟ کہا : مجھے پاک کردیجیے تو آپ نے پوچھا کہ کیا تو نے ایسے کیا تھا تھا جیسے سرمچو سرمہ دانی میں یا لاٹھی کسی چیز میں داخل کی جائے یا ڈول کنویں میں ؟ کہا : ہاں یا رسول اللہ ! تو آپ نے اس کے رجم کا حکم دے دیا۔ اسے رجم کردیا گیا تو دو شخص باتیں کر رہے تھے کہ اللہ نے اس پر پردہ ڈالا تھا، لیکن اس نے خود ظاہر کر کے کتے کی طرح رجم ہوگیا۔ نبی (صلی اللہ علیہ وآلہ وسلم) نے یہ بات سن لی۔ پھر چلے اور ایک گدھے کی سڑی ہوئی لاش کے پاس سے گزرے تو آپ نے پوچھا : فلاں فلاں کہاں ہیں ؟ وہ دونوں کھڑے ہوئے تو آپ نے فرمایا : اس گدھے کی اس سڑی ہوئی لاش سے کھاؤ۔ وہ کہنے لگے : اللہ آپ کو معاف فرمائے، اس سے کون کھائے گا ؟ تو آپ نے فرمایا : اپنے بھائی کے بارے میں تم نے جو بات کہی تھی وہ اس کے کھانے سے بھی زیادہ بری تھی اور اللہ کی قسم ! میں نے ابھی دیکھا کہ ماعز جنت کی نہر میں غوطہ لگا رہا ہے۔