(١٨٠٣٢) حضرت عروہ فرماتے ہیں کہ ثابت بن قیس بن شماس رسول اللہ (صلی اللہ علیہ وآلہ وسلم) کے پاس آئے اور کہا : آپ مجھے زبیر یہودی ہبہ کردیں تاکہ بعاث کے احسان کا بدلہ دیا جاسکے، جو اس نے میرے اوپر کیا تھا۔ آپ نے ہبہ کردیا۔ حضرت ثابت زبیر سے پوچھتے ہیں : کیا مجھے پہچانتے ہو ؟ اس نے کہا : ہاں ! کیا کوئی شخص اپنے بھائی کو نہ پہچانے گا ؟ تو ثابت فرمانے لگے : میں تیرے بعاث کے دن کے احسان کا بدلہ دینا چاہتا ہوں۔ زبیر یہودی نے کہا : بدلہ دو ۔ معزز انسان کسی معزز کا بدلہ دیتا ہے۔ ثابت کہتے ہیں کہ رسول اللہ نے مجھے ہبہ فرما دیا تھا۔ میں نے اپنے قیدی کو آزاد کردیا تو زبیر نے کہا : میری بیوی، بچے تو زبیر نے واپس آ کر کہا کہ رسول اللہ نے تیری بیوی، بچے بھی واپس کردیے ہیں۔ زبیر کہنے لگا : میرا باغ جس پر میرے گھر والوں کی گزراں تھی تو حضرت ثابت رسول اللہ (صلی اللہ علیہ وآلہ وسلم) کے پاس گئے تو آپ نے وہ بھی ہبہ کردیا تو ثابت فرماتے ہیں کہ رسول اللہ (صلی اللہ علیہ وآلہ وسلم) نے تیرا اہل و عیال، مال واپس کردیا مسلمان ہو جاؤ، محفوظ ہو جاؤ گے تو زبیر نے کہا : میرے دو ساتھیوں کا کیا بنا ؟ اس نے اپنی قوم کے اشخاص کا تذکرہ کیا۔ ثابت فرماتے ہیں : ان کے قتل سے فراغت حاصل کرلی گئی ہے۔ شاید کہ اللہ نے آپ کو بھلائی کے لیے باقی رکھا ہے تو زبیر نے کہا : میں اللہ کا واسطہ دے کر اے ثابت سوال کرتا ہوں کہ آپ میرے احسان کا بدلہ تب ادا کرسکیں گے جب مجھے بھی میرے ساتھیوں کے ساتھ ملا دیں۔ کیونکہ ان کے بعد میری زندگی اچھی نہیں ہے تو ثابت نے نبی (صلی اللہ علیہ وآلہ وسلم) سے کہا تو زبیر کے قتل کا حکم دے دیا گیا۔ (ب) موسیٰ بن عقبہ ذکر کرتے ہیں کہ وہ اس دن بوڑھا اور نابینا تھا۔