(١٨٢٧٩) ہشام بن عروہ اپنے والد سے نقل فرماتے ہیں کہ فتح کے سال رسول اللہ (صلی اللہ علیہ وآلہ وسلم) جب چلے تو قریش کو خبر ہوگئی۔ ابو سفیان بن حرب، حکیم بن حزام اور بدیل بن ورقاء رسول اللہ (صلی اللہ علیہ وآلہ وسلم) کے بارے میں خبر کی تلاش میں نکلے۔ وہ چلتے ہوئے مرالظہران نامی جگہ پر پہنچے تو اچانک وہاں آگ دیکھی گویا کہ وہ عرفہ کی آگ ہے۔ ابو سفیان کہنے لگے یہ کیا ہے ؟ گویا کہ یہ آگ ہے تو بدیل کہنے لگا : یہ بنو عمرو کی آگ ہے۔ ابو سفیان نے کہا کہ بنو عمرو کی تعداد تو بہت کم ہے تو رسول اللہ (صلی اللہ علیہ وآلہ وسلم) کے نگران لوگوں نے ان کو دیکھ لیا تو پکڑ کر رسول اللہ (صلی اللہ علیہ وآلہ وسلم) کے پاس لے آئے۔ ابو سفیان مسلمان ہوگئے۔ جب آپ (صلی اللہ علیہ وآلہ وسلم) چلے تو عباس (رض) نے فرمایا : ابو سفیان کو پہاڑ کی اونچائی پر روکو تاکہ وہ مسلمانوں کو دیکھ سکیں تو عباس (رض) نے ابو سفیان کو روک لیا تو مختلف قبیلے نبی (صلی اللہ علیہ وآلہ وسلم) کے پاس سے گزرنے لگے تو وہ ٹولیوں کی شکل میں ابو سفیان کے پاس سے گزرتے تو ابو سفیان پوچھتا : یہ کون ہیں ؟ عباس کہتے : یہ غفار قبیلہ ہے۔ ابو سفیان نے کہا : مجھے غفار سے کیا واسطہ ؟ پھر جہینہ کے لوگ گزرے تو اس نے پھر اسی طرح کہا۔ پھر سعد بن ہذیم گزرے تو اس نے ویسی ہی بات کہی۔ پھر بنو سلیم گزرے تو وہی بات کہی۔ پھر ایک بہت بڑا قبیلہ آیا تو ابو سفیان نے پوچھا : یہ کون لوگ ہیں۔ عباس (رض) کہتے ہیں : یہ انصاری ہیں جن کا جھنڈا سعد بن عبادہ کے ہاتھ میں ہے تو سعد بن عبادہ نے کہا : اے ابوسفیان آج لڑائی کا دن ہے آج حرم میں لڑائی بھی جائز ہے تو ابو سفیان نے کہا : اے عباس ! آج بہادری اور غصہ اتارنے کا دن ہے۔ پھر ایک چھوٹی جماعت آئی جس میں رسول اللہ اور صحابہ تھے اور نبی (صلی اللہ علیہ وآلہ وسلم) کا جھنڈا زبیر بن عوام کے پاس تھا۔ جب رسول اللہ ابو سفیان کے پاس سے گزرے تو ابو سفیان نے نبی (صلی اللہ علیہ وآلہ وسلم) سے کہا : کیا آپ کو معلوم ہے جو سعد بن عبادہ نے کہا ؟ پوچھا : اس نے کیا کہا ہے ؟ ابو سفیان نے کہا : فلاں فلاں بات۔ آپ (صلی اللہ علیہ وآلہ وسلم) نے فرمایا : سعد نے غلطی کی ہے۔ لیکن آج کے دن اللہ نے کعبہ کی عزت کو بڑھایا ہے اور اس دن کعبہ کو غلاف پہنایا جائے گا۔ راوی کہتے ہیں کہ رسول اللہ (صلی اللہ علیہ وآلہ وسلم) نے حکم دیا کہ ان کو اکٹھا کیا جائے ٹھہرایا جائے میں اس کو حجون نامی جگہ پر دیکھ رہا ہوں۔
(ب) جبیر بن مطعم کہتے ہیں کہ میں نے عباس سے سنا، وہ زبیر بن عوام سے کہہ رہے تھے کہ ابو عبداللہ ! رسول اللہ نے آپ کو کیا حکم دیا ہے کہ جھنڈا یہاں گاڑ دیں۔
راوی کہتے ہیں کہ اس دن رسول اللہ (صلی اللہ علیہ وآلہ وسلم) نے خالد بن ولید کو کداء کی جانب سے مکہ میں داخل ہونے کا حکم دیا اور خود نبی (صلی اللہ علیہ وآلہ وسلم) کدیٰ کی جانب سے داخل ہوئے تو خالد بن ولید کے ساتھیوں نے دو آدمیوں کو قتل کیا۔ حبیش بن اشعر اور کرز بن جابر فہری کو۔