(١٨٨٠٧) مسوربن مخرمہ اور مروان بن حکم فرماتے ہیں کہ حدیبیہ کے سال نبی مکرم (صلی اللہ علیہ وآلہ وسلم) ایک ہزار سے کچھ زیادہ صحابہ کرام کے ساتھ نکلے۔ جب آپ ذوالحلیفہ میں پہنچے تو قربانی کے جانوروں کی گردنوں میں پٹے ڈالے اور اونٹوں کا شعار کیا۔ عمرہ کا احرام باندھا اور اپنے آگے خزاعہ قبیلے کا شخص قریش کی جاسوسی روانہ کردیا۔ جب آپ وادی انشاط جو عسفان کے قریب ہے پہنچے تو خزاعی جاسوس آگیا۔ اس نے کہا کہ کعب بن لوئی اور عامر بن لوئی نے آپ لشکر جمع کیے ہیں۔
(ب) یحییٰ بن سعید حضرت عبداللہ بن مبارک سے نقل فرماتے ہیں کہ انھوں نے تمہارے لیئے لشکر جمع کیے ہیں۔ آپ سے لڑکربیت اللہ سے روکنا چاہتے ہیں۔ نبی (صلی اللہ علیہ وآلہ وسلم) نے فرمایا : مجھے ان کے بارے میں مشورہ دو ۔ کیا تم چاہتے ہو کہ ہم مدد کرنے والوں کی اولاد کو پکڑ لیں۔ اگر وہ بیٹھے رہے تو پریشان ہوں گے اور اگر نجات پاجائیں تو گردن کٹی ہوگی۔ جس کو اللہ نے کاٹ ڈالا ہے یا تمہارا خیال ہے کہ ہم صرف بیت اللہ سے روکنے والوں کے خلاف لڑائی کریں۔ تو حضرت ابوبکر نے فرمایا : اللہ اور رسول بہتر جانتے ہیں۔ ہم تو صرف عمرہ کرنے کی غرض سے آئے تھے۔ لڑائی کا کوئی ارادہ نہ تھا، لیکن پھر بھی جو بیت اللہ اور ہمارے درمیان رکاوٹ بنا ہم اس سے لڑائی کریں گے آپ نے فرمایا : تب چلو۔
زہری فرماتے ہیں : کہ حضرت ابوہریرہ (رض) فرماتے ہیں کہ رسول اللہ (صلی اللہ علیہ وآلہ وسلم) سے بڑھ کر کوئی اپنے صحابہ سے مشورہ نہیں لیتا تھا۔ زہری مسور بن مخرمہ اور مروان بن حکم کی حدیث کے بارے میں کہتے ہیں کہ جب وہ کسی راستے پر چلے تو نبی (صلی اللہ علیہ وآلہ وسلم) نے فرمایا : خالد بن ولید غمیم نامی جگہ پر قریش کے ہراول دستہ پر ہیں۔ تم دائیں جانب چلو۔ اللہ کی قسم ! خالد کو پتہ بھی نہیں چلا۔ اچانک وہ لشکر کے پیچھے تھا۔ وہ قریشیوں کو ڈرا رہا تھا۔ جب اس گھاٹی میں پہنچے جس کے آگے کفار کا سامنا تھا تو آپ کی سواری بیٹھ گئی۔ لوگوں نے آواز لگائی اٹھو۔ اٹھو قصواء ٹھہرگئی۔ قصواء ٹھہر گئی۔ نبی مکرم (صلی اللہ علیہ وآلہ وسلم) نے فرمایا : قصواء اٹھہری نہیں۔ اور نہ ہی اس کی عادت ہے۔ اسے تو اس ذات نے روکا ہے۔ جس نے ابرہہ کے ہاتھیوں کو روکا تھا۔ پھر آپ نے فرمایا : اس ذات کی قسم جس کے ہاتھ میں میری جان ہے۔ وہ (قریش ) مجھ سے ایسی بات کا مطالبہ کریں ، جس میں وہ اللہ کی حرمتوں کی تعظیم کرتے ہوں تو میں ان کی ہر ایسی بات تسلیم کرلوں گا۔ تب آپ نے قصواء کو ڈانٹا تو وہ اچھل کر کھڑی ہوگئی۔ آپ مکہ کے راستے سے ہٹ گئے اور حدیبہ کی طرف روانہ ہوئے۔ پھر حدیبہ کے آخری کنارے پر اترے۔ جہاں معمولی پانی کا کنواں تھا۔ لوگ وہاں تھوڑا تھوڑا پانی حاصل کر رہے تھے اور تھوڑی دیر میں لوگوں نے اس کا پانی ختم کردیا۔ جب رسول اکرم (صلی اللہ علیہ وآلہ وسلم) کی خدمت میں پیاسی کی شکایت کی گئی تو آپ نے اپنے ترکش سے ایک تیر نکالا اور لوگوں کو حکم دیا کہ اس تیر کو کنویں میں پھینکو۔ راوی بیان کرتا ہے کہ اللہ کی قسم ! تیر ڈالنے سے پانی جوش سے نکلنے لگا۔ یہاں تک کہ لوگ واپسی تک خوب سیر ہو کر پیتے رہے۔ وہ اس حالت میں تھے کہ بدیل بن ورقاء خزاعی بنو خزاعہ کی ایک جماعت کے ساتھ آیا۔ وہ اہل تہامہ سے رسول اللہ (صلی اللہ علیہ وآلہ وسلم) کا راز دار تھا۔ اس نے کہا : میں کعب بن لوئی اور عامر بن لوئی کو چھوڑ کر آیا ہوں۔
احمد (رض) فرماتے ہیں : یحییٰ بن سعید حضرت عبداللہ بن مبارک سے نقل فرماتے ہیں کہ اس نے کہا : میں نے کعب بن لوی اور عامر بن لوی کو حدیبیہ کے پانیوں پر اتنی تعداد میں چھوڑا ہے۔ وہ آپ سے سے لڑ کر بھیبیت اللہ سے روکنا چاہتے ہیں۔ آپ نے فرمایا : ہم لڑائی کے لیے نہیں، صرف عمرہ کے لیے آئے ہیں، قریش کو لڑائیوں نے کمزور کردیا اور نقصان دیا ہے۔ اگر وہ چاہیں گے تو میں ان کے ساتھ کوئی مدت مقرر کرلوں گا اور وہ ہمارا راستہ چھوڑ دیں۔ اگر چاہیں تو جس طرح لوگ شامل ہیں وہ بھی ہوجائیں وگرنہ وہ تمام جمع ہوجائیں۔ اگر وہ انکار کریں تو اللہ کی قسم میں اپنے اس دین پر ان سے قتال کروں گا یہاں تک کہ میں اکیلا بھی رہ جاؤں یا اللہ رب العزب اپنا حکم نافذ فرما دیں۔ بدیل نے کہا : میں آپ کی بات پہنچا دیتا ہوں۔ وہ قریش کے پاس آئے اور کہا : میں اس شخص (یعنی محمد) کے پاس سے آیا ہوں۔ میں نے کچھ باتیں ان سے سنیں ہیں۔ اگر تم چاہو تو بتا دیتا ہوں، ان کے بیوقوف لوگوں نے کہا : اس کی کوئی بات بھی ہمارے سامنے بیان نہ کرو، ہمیں کوئی ضرورت نہیں، لیکن عقلمند انسانوں نے کہا : بتاؤ کیا سن کے آؤ ہو ؟ اس نے کہا : اے لوگو ! نہ تم بچے ہو اور نہ ہی میں بچہ ہوں۔ عروہ نے کہا : کیا تم مجھ پر کوئی تہمت رکھتے ہو ؟ انھوں نے کہا کوئی الزام نہیں ۔ کہنے لگا : کیا تم جانتے ہو جس وقت میں اہل متنفر ہوا۔ جب انھوں نے میری بات نہ مانی تو میں تمہارے پاس اپنے اہل و عیال بچے اور اپنے پیروکار لیکر آیا تھا تو قریشیوں نے کہا : بات تو آپ کی درست ہے تو عروہ نے کہا : اس نے درست مطالبہ پیش کیا ہے اس کو قبول کرلو اور مجھے اس کے پاس جانے دوتو قریشیوں نے جانے کی اجازت دے دی، عروہ نے بھی نبی (صلی اللہ علیہ وآلہ وسلم) سے بدیل کی طرح بات کی اور عروہ نے اس وقت یہ بات بھی کی کہ اے محمد ! آپ کا کیا خیال ہے، اگر آپ اپنی قوم کو ختم کر ڈالیں تو کیا آپ نے سن رکھا ہے کہ آپ سے پہلے کسی نے اپنی قوم کو ختم کیا ہو اور دوسری جانب اللہ کی قسم میں اپنے آوارہ قسم کے لوگ دیکھ رہا ہوں، جو آپ کو چھوڑ کر بھاگ جائیں گے تو حضرت ابوبکر (رض) نے فرمایا : جاؤ لات کی شرم گاہ کو چوس۔ کیا ہم آپ کو چھوڑ کر بھاگ جائیں گے ! تو عروہ نے پوچھا : یہ کون ہے ؟ فرمایا : ابوبکر (رض) تو عروہ نے کہا : اللہ کی قسم ! اگر تیرا میرے اوپر احسان نہ ہوتا تو میں تجھے جواب دیتا۔ پھر نبی (صلی اللہ علیہ وآلہ وسلم) سے بات چیت شروع کردی۔ جب بھی بات کرتا تو اپنا ہاتھ نبی (صلی اللہ علیہ وآلہ وسلم) کی داڑھی کو لگاتا، مغیرہ بن شعبہ تلوار لیے اور خود پہنے نبی (صلی اللہ علیہ وآلہ وسلم) کے سر کے پاس ہی کھڑے تھے۔ جب بھی عروہ اپنا ہاتھ نبی (صلی اللہ علیہ وآلہ وسلم) کی داڑھی کی طرف لاتا تو مغیرہ اپنا ہاتھ تلوار کے دستہ پر مارتے اور کہتے کہ اپنا ہاتھ نبی (صلی اللہ علیہ وآلہ وسلم) کی داڑھی مبارک سے دور کر، عروہ نے پوچھا : یہ کون ہے ؟ صحابہ نے کہا : مغیرہ بن شعبہ ہے۔ عروہ نے کہا : اے دھوکے باز ! کیا میں نے تیرے دھوکے کی رقم ادا نہ کی تھی ؟ اور مغیرہ اپنی قوم سے تھے زمانہ جاہلیت میں جس نے قتل کیا اور مال لوٹا۔ پھر وہ آ کر مسلمان ہوگئے، آپ نے فرمایا تھا اسلام تو تیرا میں قبول کرلیتا ہوں لیکن مال سے میرا کوئی تعلق نہیں ہے۔ پھر عروہ نے نبی (صلی اللہ علیہ وآلہ وسلم) کا اپنی آنکھوں سے مشاہدہ کیا۔ نبی (صلی اللہ علیہ وآلہ وسلم) کا لعاب دہن بھی صحابی کے ہاتھ پر گرتا تھا۔ جسے وہ اپنے چہروں اور جسم پر مل لیتے تھے اور جب آپ حکم دیتے تو وہ اس کی تعمیل جلد ہی کردیتے اور جب آپ وضوء فرماتے تو آپ کے وضو کے پانی پر قریب تھا کہ وہ جھگڑ پڑتے اور جب آپ ان سے کلام کرتے تو ان کی آوازیں پست ہوجاتیں ، اور کوئی نظر بھر کر آپ کی طرف تعظیما نہیں دیکھتا تھا، عروہ قریش کے پاس واپس آیا اور کہا : اے میری قوم ! میں قیصری وکسریٰ اور نجاشی کے دربار میں گیا ہوں۔ میں نے کسی بادشاہ کو نہیں دیکھا کہ اس کے ساتھی اس کی اتنی تعظیم کرتے ہیں ض، جتنی نبی (صلی اللہ علیہ وآلہ وسلم) کے صحابہ محمد کی تعظیم کرتے ہیں۔ اللہ کی قسم ! اگر تھوکیں تو وہ بھی کسی شخص کی ہتھیلی پر گرے جس کو وہ اپنے چہرے اور جسم پر مل لے اور حکم کی جلد تعمیل کریں اور آپ کے وضو کے پانی پر قریب تھا کہ جھگڑ پڑیں اور جب وہ کلام کرتے ہیں تو آپ کے پاس پست آواز میں اور نظر بھر کر آپ کو تعظیما نہیں دیکھتے۔ انھوں نے اچھی بات پیش کی ہے قبول کرلو، بنو کنانہ کے ایک شخص نے کہا : میں ان کے پاس جاتا ہوں، قریش نے اسے بھی جانے کی اجازت دی، جب وہ نبی (صلی اللہ علیہ وآلہ وسلم) اور صحابہ کے پاس گیا تو نبی (صلی اللہ علیہ وآلہ وسلم) نے فرمایا : یہ فلاں ہے وہ اپنی قوم سے ہے۔ قربانیوں کی تعظیم کرتے ہیں، ان کے سامنے قربانیاں پیش کرو، لوگوں نے تلبیہ کہتے ہوئے اس کا استقبال کیا، جب اس نے دیکھا تو کہنے لگا : اللہ پاک ہے ایسے لوگوں کو بیت اللہ سے نہ روکا جائے، پھر مکرز بن حفص نے کہا : مجھے ان کے پاس جانے کی اجازت دو ، جب وہ آیا تو آپ نے فرمایا : مکرز بن حفص فاجر آدمی ہے، اس نے نبی (صلی اللہ علیہ وآلہ وسلم) سے بات چیت شروع کی۔ درمیان میں سہیل بن عمرو آگیا، عکرمہ فرماتے ہیں : جبسہیل بن عمرو آیا تو نبی (صلی اللہ علیہ وآلہ وسلم) نے فرمایا : تمہارے معاملہ میں آسانی کی گئی ہے۔
زہری فرماتے ہیں : سہیل بن عمرو نے کہا : لاؤ میں اپنے اور تمہارے درمیان معاہدہ تحریر کروں۔ اس نے کاتب کو منگوایا تو آپ نے فرمایا : لکھو میں اللہ کے نام سے شروع کرتا ہوں جو نہایت مہربان رحم کرنے والا ہے تو سھیل نے کہا : رحمن کو ہم نہیں جانتے، بلکہ لکھو تیرے نام کے ساتھ اے اللہ ! تو آپ نے فرمایا : لکھو، باسمک اللھم، پھر فرمایا : لکھو یہ معاہدہ ہے جو محمد اللہ کے رسول نے کیا، سہیل نے اعتراض کرتے ہوئے کہا : اللہ کی قسم ! اگر ہم اس بات پر یقین رکھتے کہ تم اللہ کے رسول ہو تو تمہیں بیت اللہ میں داخل ہونے سے نہ روکتے۔ تم محمد بن عبداللہ تحریر کرو، یہ سن کر نبی کریم (صلی اللہ علیہ وآلہ وسلم) نے فرمایا : اللہ کی قسم ! تمہارے جھٹلانے کے باوجود میں اللہ کا رسول ہوں۔ محمد بن عبداللہ ہی تحریر کیا جائے۔ زھری نے اس قول کے بارے میں کہا کہ قریش مجھ سے ایسی بات کا مطالبہ کریں، جس میں وہ اللہ کی حرمتوں کی تعظیم کرتے ہوں تو میں ان کی ہر ایسی بات تسلیم کرلوں گا۔ نبی (صلی اللہ علیہ وآلہ وسلم) نے فرمایا کہ ہمارے اور بیت اللہ کے درمیان سے ہٹ جاؤ کہ ہم بیت اللہ کا طواف کریں تو سہیل نے کہا : اللہ کی قسم عرب بات نہ کریں گے کہ ہم اچانک پکڑ لیے گئے، لیکن آپ آئندہ سال آجانا۔ آپ نے تحریر کروادیا تو سھیل نے کہا : ہماری طرف سے جو شخص آپ کے پاس چلا آئے چاہے وہ آپ کے دین پر ہو تو آپ اسے ہماری طرف واپس کرنے کے پابند ہوں گے۔ مسلمانوں نے کہا : اللہ پاک ہے کیسے مشرکین کی طرف اسے واپس کیا جائے گا، جب وہ مسلمان ہو کر آجائے۔ ہم اسی حالت میں تھے کہ ابو جندل سہیل اپنی بیڑیوں میں باندھے آگئے، وہ مکہ کی نچلی جانب سے نکل کر مسلمانوں کے درمیان آیا تھا، سھیل نے کہا : اے محمد ! یہ پہلا مطالبہ ہے کہ آپ ابو جندل کو واپس کردیں۔ آپ نے فرمایا : ہم معاہدہ کے بعدوعدہ کی خلاف ورزی نہیں کرتے ، لیکن ابھی معاہدہ مکمل نہیں ہوا تو سھیل نے کہا : پھر ہم معاہدہ کرتے ہی نہیں۔ آپ نے فرمایا : اس کو میری وجہ سے پناہ دے ۔ سھیل نے کہا : میں پناہ نہ دوں گا، آپ نے فرمایا : چلو اسے کرلو۔ راوی کہتے ہیں : ہم ایسا کرنے والے نہیں ہیں تو مکرز نے کہا : ہم نے آپ کے لیے اس کو پناہ دی تو ابو جندل نے کہا : اے مسلمان گروہ ! میں مشرکین کی طرف واپس کیا جاؤں گا ، حالانکہ میں مسلمان ہوں، کیا تم دیکھتے نہیں ہو میں کس حالت میں آیا ہوں اور مجھے اللہ کے بارہ میں سزا دی گئی ہے۔ حضرت عمر (رض) فرماتے ہیں : میں نبی (صلی اللہ علیہ وآلہ وسلم) کے پاس آیا اور کہا : کیا آپ اللہ کے نبی نہیں ؟ فرمایا : اللہ کا نبی ہوں، میں نے پوچھا : کیا ہم حق پر اور ہمارے دشمن باطل پر نہیں ؟ فرمایا : ہم حق پر اور ہمارے دشمن باطل پر ہیں، میں نے کہا : تب دین میں اتنی کمزوری کیوں ؟ آپ نے فرمایا : میں اللہ کا رسول ہوں، میں اس کی نافرمانی نہیں کرتا، وہ میرا مدد گار ہے۔ میں نے پوچھا : آپ نے فرمایا تھا کہ ہم عنقریب بیت اللہ کا طواف کریں گے ؟ فرمایا : کہا تھا، کیا میں نے یہ بھی کہا تھا کہ اسی سال۔ میں نے کہا : یہ تو نہ فرمایا تھا : فرمایا تم آ کر اس کا طواف کرو گے۔ حضرت عمر (رض) فرماتے ہیں : میں ابوبکر (رض) کے پاس آیا۔ میں نے پوچھا : اے ابوبکر (رض) ! کیا اللہ کے نبی حق پر نہیں ؟ انھوں نے کہا : حق پر ہیں، میں نے کہا : کیا ہم حق پر اور ہمارا دشمن باطل پر نہیں ؟ انھوں نے کہا : ایسے ہی ہے، میں نے کہا : پھر ہم اپنے دین میں کمزوری کیوں دکھا رہے ہیں، ابوبکر (رض) کہنے لگے : اے عمر (رض) ! وہ اللہ کے رسول (صلی اللہ علیہ وآلہ وسلم) ہیں۔ وہ اپنے رب کی ہرگز نافرمانی نہ کریں گے اور وہ اس کی مدد فرمائے گا۔ فوت ہونے تک حوصلہ کرو، اللہ کی قسم ! وہ حق پر ہیں۔ حضرت عمر (رض) نے کہا کہ آپ نے بیت اللہ کے طواف کے بارے میں کہا تھا ؟ ابوبکر (رض) نے فرمایا : کیا آپ نے اس سال ہی طواف کے بارے میں کہا تھا ؟ میں نے کہا : نہیں تو انھوں نے کہا کہ آپ آ کر اس کا طواف کرلیں گے۔ زھری کہتے ہیں کہ حضرت عمر (رض) نے کہا : میں نے اس کے بارے میں کچھ کام کیے، جب معاہدہ مکمل ہوا تو رسول اللہ (صلی اللہ علیہ وآلہ وسلم) نے پنے صحابہ کو قربانیاں کرنے کا حکم دیا، پھر فرمایا : سر کے بال منڈواؤ۔ راوی کہتے ہیں کہ آپ کے تین مرتبہ کہنے کے باوجود کوئی بھی شخص کھڑا نہ ہوا۔ جب کوئی کھڑا نہ ہوا تو آپ ام سلمہ کے پاس چلے گئے ، جو لوگوں کی جانب سے پریشانی آئی بتایا تو ام سلمہ نے پوچھا : کیا آپ اس کو پسند کرتے ہیں تو جا کر اپنی قربانی کرو اور کسی سے کلام نہ کرنا اور اپنا سر منڈواؤ تو آپ نے ایسا ہی کیا۔ کسی سے کلام کیے بغیر اپنی قربانی کی اور سر مونڈنے والے کو بلا کر سر منڈوایا۔ جب انھوں نے یہ دیکھا تو قربانیاں نحر کیں اور ایک دوسرے کے سر مونڈ دیے۔ قریب تھا کہ حالت غم میں وہ اپنے ساتھی کو قتل کردیں، پھر چند مومنہ عورتیں آئیں تو اس پر اللہ تعالیٰ نے یہ آیت نازل فرمائی : { یاَیُّہَا الَّذِیْنَ اٰمَنُوْا اِذَا جَائَکُمُ الْمُؤْمِنَاتُ مُہَاجِرَاتٍ } (الممتحنہ : ١٠) حتی بلغ { بِعِصَمِ الْکَوَافِرِ } اے ایمان والو ! جب تمارے پاس مومن عورتیں ہجرت کر کے آئیں۔ وہ کافروں کے لیے حلال نہیں ہیں۔ راوی کہتے ہیں : اسی دن حضرت عمر (رض) نے دو عورتوں کو طلاق دی۔ ایک سے معاویہ بن ابی سفیان (رض) اور دوسری سے صفوان بن امیہ (رض) نے نکاح کرلیا۔ پھر آپ مدینہ واپس آگئے تو ابو بصیر آگئے یہ قریش کا مسلمان آدمی تھا، یحییٰ عبداللہ بن مبارک سے نقل فرماتے ہیں کہ ابو بصیر بن اسید ثقفی نے مسلمان ہو کر ہجرت کی تو اخنس بن شریق جو کافر آدمی تھا بنو عامر بن لوئی سے، اس نے اپنے غلام اور ایک دوسرے شخص کو خط لکھ کردیا کہ آپ سے کہنا کہ وعدہ پورہ کرو تو کفار مکہ نے اس کو واپس لانے کے لیے دو آدمیوں کو بھیجا، جو آپ نے ہمارے ساتھ معاہدہ کیا ہوا ہے، آپ نے ابو بصیرکو ان کے حوالے کردیا۔ وہ اسے لیکر مکہ چل پڑے۔ جب وہ ذوالحلیفہ مقام پر پہنچے تو وہ دونوں آدمی وہاں رک کر کھجوریں کھانے لگے تو ابو بصیر نے دونوں میں سے ایک آدمی سے کہا : اے فلاں ! اللہ کی قسم ! مجھے تمہاری یہ تلوار بہت عمدہ معلوم ہوتی ہے۔ دوسرے نے تلوار سونتی، اس نے کہا : اللہ کی قسم ! یہ بہت عمدہ ہے۔ میں نے اس کا تجربہ کیا ہوا ہے، ذرا مجھے دیکھاؤ میں یہ دکھا ؤ چاہتا ہوں۔ اس نے یہ تلوار ابو بصیر کو پکڑا دی تو ابو بصری نے تلوار ماری۔ جب وہ ٹھنڈا ہوگیا اور دوسرا آدمی بھاگ کر مدینہ منورہ پہنچا اور ہانپتا ہوا مسجد نبوی میں داخل ہوا تو اسے دیکھ کر نبی (صلی اللہ علیہ وآلہ وسلم) نے فرمایا : اس شخص کا کسی خوفناک واقعہ سے واسطہ پڑا ہے۔ اس نے جلدی سے کہا : میرا ساتھی قتل ہوچکا، بلاشبہ میں بھی قتل ہو جاؤں گا۔ اتنے میں ابو بصیر بھی آپہنچا، ابو بصیر نے کہا : اے اللہ کے نبی (صلی اللہ علیہ وآلہ وسلم) ! اللہ نے آپ کا ذمہ پورا کردیا، آپ نے مجھے واپس کردیا، پھر اللہ نے مجھے ان سے نجات دی، تو نبی (صلی اللہ علیہ وآلہ وسلم) نے فرمایا : تیری ماں مرجائے تو لڑائی کی آگ بھڑکانے والا ہے۔ اگرچہ تیرا ایک ہی ساتھی کیوں نہ ہو، ابو بصیر نے یہ سن کر یقین کرلیا کہ نبی کریم (صلی اللہ علیہ وآلہ وسلم) اس کو واپس بھیج دیں گے تو وہ وہاں سے نکل کر ساحل سمندر جا پہنچا، اسی دوران ابو جندل بن سھیل بیڑیاں توڑ کر نکلا اور ابو بصیر سے آ ملا، پھر جو شخص بھی قریش مکہ سے مسلمان ہو کر نکلتا، وہ ابو بصیر کے ساتھ آ ملتا، یہاں تک کہ ان کی ایک جماعت قائم ہوگئی۔ راوی نے بیان کیا کہ اللہ کی قسم ! جب وہ قریش کے کسی قافلہ کے بارے میں سنتے کہ وہ شام کی جانب جا رہا ہے تو وہ اس قافلہ پر حملہ کردیتے، قافلے والوں کو موت کی گھاٹ اتار دیتے اور ان کے مالوں پر قبضہ کرلیتے تو قریش نے گھبرا کر نبی اکرم (صلی اللہ علیہ وآلہ وسلم) کو پیغام بھیجا اور آپ کو صلہ رحمی اور اللہ کی قسم دے کر کہا کہ آپ (ابو بصیر گروپ) کو پیغام بھیجیں اور انھیں مدینہ منورہ بلا لیں، نیز جو شخص آپ کے پاس مسلمان ہو کر آجائے امن والا ہے تو نبی اکرم (صلی اللہ علیہ وآلہ وسلم) نے ان کی طرف پیغام بھیجا کہ وہ مدینہ منورہ آجائیں، اس پر اللہ نے یہ آیت نازل فرمائی : { وَہُوَ الَّذِیْ کَفَّ اَیْدِیَہُمْ عَنْکُمْ وَاَیْدِیَکُمْ عَنْہُمْ } حتی بلغ { حَمِیَّۃَ الْجَاہِلِیَّۃِ } [الفتح ٢٦] وہ ذات جس نے ان کے ہاتھوں سے تمہیں اور تمہارے ہاتھوں سے انھیں بچایا اور ان کی غیرت یہ تھی کہ انھوں نے آپ کو نبی نہ مانا اور بسم اللہ الرحمن الرحمن نہ لکھنے دی اور بیت اللہ سے روکا۔ [صحیح۔ بخاری ٢٧٣٤]