(١٨٨٠٨) اسماعیل بن ابراہیم بن عقبہ اپنے چچا موسیٰ بن عقبہ سے اس قصہ کے ہم معنیٰ نقل فرماتے ہیں، اس میں کچھ زیادہ ہے کہ رسول اللہ (صلی اللہ علیہ وآلہ وسلم) نے حضرت عمر (رض) کو قریش کی طرف بھیجنے کیلئے بلایا جب بلدح نامی جگہ پر تھے، تو حضرت عمر (رض) نے فرمایا : اے اللہ کے رسول (صلی اللہ علیہ وآلہ وسلم) ! مجھے اپنی جان کا خوف ہے۔ آپ حضرت عثمان بن عفان (رض) کو بھیج دیں۔ آپ نے حضرت عثمان بن عفان (رض) کو بھیج دیا۔ جب ان کی ملاقات ابان بن سعید سے ہوئی تو اس نے پناہ دے کر اپنے گھوڑے کی اگلی جانب سوار کر کے قریش کے پاس لائے تو حضرت عثمان (رض) نے رسول اللہ (صلی اللہ علیہ وآلہ وسلم) کے حکم کے مطابق قریش سے بات کی، قریش نے سہیل بن عمرو کو صلح کیلئے روانہ کردیا، حضرت عثمان بن عفان (رض) کے مکہ میں بہت زیادہ رشتہ دار تھے، جنہوں نے حضرت عثمان (رض) کو بیت اللہ کے طواف کی دعوت دی تو حضرت عثمان (رض) نے نبی (صلی اللہ علیہ وآلہ وسلم) کے بغیر طواف کرنے سے انکار کردیا، وہ سہیل بن عمرو کو ساتھ لیکر رسول اللہ (صلی اللہ علیہ وآلہ وسلم) کے پاس آئے تاکہ صلح کرسکیں، اس نے صلح کا قصہ اور معاہدہ کی تحریر کا تذکرہ کیا، پھر اس رسول اللہ (صلی اللہ علیہ وآلہ وسلم) نے حضرت عثمان (رض) کو معاہدہ کی تحریر دے کر روانہ کیا، پھر اس نے دونوں فریقوں کے درمیان جو جنگ بندی ہوئی اس کا تذکرہ کیا۔
پھر رسول اللہ (صلی اللہ علیہ وآلہ وسلم) نے مسلمانوں کو بیعت کی جانب بلایا، جب قریش نے یہ دیکھا تو ان کے دل میں اللہ نے رعب ڈال دیا تو انھوں نے تمام گروی اشیاء روانہ کردیں اور آپ کو صلح کی دعوت دی۔ آپ نے ان سے صلح کی اور معاہدہ تحریر کروادیا۔