(١٩١٨٣) ابو عیاش جابر بن عبداللہ (رض) سے نقل فرماتے ہیں کہ نبی (صلی اللہ علیہ وآلہ وسلم) نے دو چتکبرے، سینگوں والے خصی مینڈھے ذبح کیے۔ جب ان کو قبلہ رخ کیا تو فرمایا : میں نے اپنے چہرے کو اس ذات کی جانب متوجہ کرلیا جس نے آسمان و زمین کو پیدا فرمایا ملت ابراہیم پر اور میں مشرکین میں سے نہیں ہوں۔ یقیناً میری نماز اور میری قربانی اور میری زندگی اور میری موت رب العالمین کے لیے ہے، اس کا کوئی شریک نہیں اور اس کا میں حکم دیا گیا ہوں اور میں مسلمانوں میں سے ہوں۔ اے اللہ ! یہ تیری طرف سے ہے اور تیرے راستہ میں محمد (صلی اللہ علیہ وآلہ وسلم) اور اس کی امت کی جانب سے۔ بسم اللہ واللہ اکبر پڑھ کر ذبح کردیے۔
(ب) وہبی کی روایت میں ہے کہ رسول اللہ (صلی اللہ علیہ وآلہ وسلم) نے عید کے دن دو مینڈھے ذبح فرمائے اور انھیں قبلہ رخ لٹا کر یہ دعا پڑھی : اے اللہ یہ تیری عطا ہے اور تیرے راستہ میں محمد اور اس کی امت کی جانب سے ہے اور بسم اللہ واللہ اکبر پڑھ کر ذبح کردیے۔
(ج) امام شافعی (رح) فرماتے ہیں کہ یہ نبی (صلی اللہ علیہ وآلہ وسلم) سے منقول ہے ، لیکن اس طرح ثابت نہیں کہ آپ (صلی اللہ علیہ وآلہ وسلم) نے دو مینڈھے ذبح کیے۔ ان میں سے ایک میں ہے کہ اللہ کے ذکر کے بعد فرمایا : اے اللہ ! محمد اور امت محمد کی جانب سے اور اس کے آخر میں ہے کہ اے اللہ ! محمد اور امت محمد کی جانب سے ہے۔