(٢٣٧٤) (ا) اور اس سند کے ساتھ زہری سے روایت ہے کہ مجھے سیدنا انس بن مالک (رض) نے خبر دی کہ حضرت حذیفہ بن یمان حضرت عثمان (رض) کے دور خلافت میں ان کے پاس تشریف لائے، جب کہ وہ آرمینیہ اور آذربائیجان کی طرف اہل عراق کے ساتھ شریکِ جہاد تھے۔ وہ اہل عراق اور اہل شام کی سرحد پر برسرپیکار تھے تو وہاں اہل عراق اور اہل شام نے قرآن کی قراءت میں اختلاف کیا حتیٰ کہ حضرت حذیفہ (رض) کو ان کے اختلاف کا پتہ چلا تو وہ سہم گئے اور فوراً مدینہ کو عازم سفر ہوئے اور عثمان (رض) کے پاس آئے اور عرض کیا : اے امیرالمومنین ! (خدارا) اس امت کی خبر لیجیے۔ اس سے پہلے کہ یہ یہود و نصاریٰ کی طرح قرآن میں اختلاف کرنے لگیں۔
سیدنا عثمان (رض) اس واقعہ سے حیران ہوگئے اور ام المومنین سیدہ حفصہ بنت عمر (رض) کو پیغام بھیجا کہ وہ مصحف ارسال فرما دیں جس میں قرآن جمع کیا گیا ہے۔ سیدہ حفصہ (رض) نے وہ مصحف حضرت عثمان (رض) کو بھیج دیا۔ سیدنا عثمان (رض) نے زید بن ثابت، سعید بن عاص، عبداللہ بن زبیر اور عبدالرحمن بن حارث بن ہشام (رض) کو حکم دیا کہ اس قرآن کی کاپیاں تیار کریں۔ حضرت عثمان (رض) نے انھیں فرمایا کہ جب تمہارا زید بن ثابت (رض) سے قرآن کی عربی میں اختلاف ہوجائے تو اس کو لسانِ قریش میں لکھو کیونکہ قرآن انہی کی زبان اور محاورے پر نازل ہوا ہے۔ انھوں نے ایسا ہی کیا حتیٰ کہ مصاحف تیار ہوگئے۔ پھر حضرت عثمان (رض) نے سیدہ حفصہ (رض) کا مصحف انھیں واپس کردیا اور مسلمانوں کے لشکروں میں سے ہر لشکر کی طرف ایک ایک مصحف روانہ کیا اور انھیں حکم دیا کہ یہ جو مصحف آپ کو بھیجا گیا ہے اس کے خلاف کوئی بھی مصحف ہو تو اس کو جلا دیا جائے اور اس دور میں مصاحف کو جلایا گیا۔
(ب) ابراہیم بن سعد سے اس طرح کی روایت منقول ہے مگر اس میں سیدہ حفصہ (رض) کا مصحف واپس لوٹانے کا ذکر نہیں ہے۔
(ج) ابن حمزہ کی روایت میں ہے کہ انھوں نے صحیفوں کو مصاحف میں لکھا، پھر ہر ملک میں ایک ایک مصحف بھیج دیا اور ان کے علاوہ باقی ہر صحیفے کی قراءت کے بارے حکم دیا کہ یا تو مٹا دیا جائے یا جلا دیا جائے۔
(د) امام بخاری (رح) نے اپنی صحیح میں ابو ایمان سے اس کو روایت کیا ہے۔ ان کے علاوہ موسیٰ بن اسماعیل اور ابراہیم بن سعد سے بھی روایت کیا ہے۔ اس میں ہے :” من المومنین رجال صدقوا ما عہدوا اللہ علیہ۔ (الاحزاب : ٢٣) ” مومنوں میں سے کچھ ایسے ہیں جنہوں نے اللہ سے کیا ہوا وعدہ سچ کر دکھایا۔ “