(٢٣٧٦) (ا) حضرت ابن عباس (رض) سے روایت ہے کہ میں نے عثمان (رض) سے کہا : تمہیں کس چیز نے ابھارا کہ تم نے سورة توبہ کو جو ان سورتوں میں سے ہے جن کی آیات ٢٠٠ (دو سو) کے قریب ہیں اور سورة انفال کو جو ان سورتوں میں سے ہے جن کی آیات اسی (٨٠) کے قریب ہیں ملا دیا ہے اور تم نے ان دونوں کے درمیان سطر بھی نہیں چھوڑی، جس میں بسم اللہ الرحمن الرحیم لکھا ہو اور تم نے اسے سات لمبی سورتوں میں رکھا ہے ؟ تو حضرت عثمان (رض) نے فرمایا کہ رسول اللہ (صلی اللہ علیہ وآلہ وسلم) پر وہ سورتیں نازل ہوتی تھیں جن میں فلاں فلاں چیزیں ذکر کی جاتی ہیں۔ جب آپ پر آیات نازل ہوتیں تو آپ فرماتے : ان آیات کو فلاں فلاں جگہ پر رکھو اور جب آپ پر کوئی (مکمل) سورت نازل ہوتی تو فرماتے : اس سورت کو فلاں جگہ پر رکھو (لکھو) اور سورة انفال مدینہ میں نازل ہونے والی ابتدائی سورتوں میں سے ہے اور سورة توبہ نزول کے اعتبار سے آخری سورتوں میں سے ہے اور اس کا موضوع بھی اس سے ملتا جلتا ہے۔ (یعنی ان دونوں سورتوں کا مضمون ملتا جلتا ہے، لیکن جب رسول اللہ (صلی اللہ علیہ وآلہ وسلم) فوت ہوگئے اور ان کے معاملے کو واضح نہ کیا تو میں نے گمان کیا شاید یہ (توبہ) بھی اس (انفال) کا حصہ ہے، اس لیے میں نے ان دونوں کو قریب قریب رکھا اور میں نے ان کے درمیان سطر نہیں چھوڑی کہ جس میں بسم اللہ الرحمن الرحیم لکھتا اور اس کو بھی میں نے سات لمبی سورتوں میں رکھا۔
(ب) اس حدیث میں اس بات کی دلیل ہے کہ صحابہ (رض) کے مصاحف میں جو بسم اللہ لکھی گئی تھی یہ مشاہدے کی بنا پر لکھی گئی ہے۔
(ج) ہم وہ روایت بھی ذکر کرچکے ہیں جو ابن عباس (رض) سے منقول ہے کہ یہ (بسم اللہ) سورتوں کے شروع میں ان کے نزول کی وجہ سے لکھی جاتی ہے اور نزول کے وقت یہ پتا چل جاتا تھا کہ ایک سورة ختم ہوگئی ہے اور دوسری شروع ہوچکی ہے۔