(٢٧٧٥) (ا) عمرو بن محمد بن عطا فرماتے ہیں کہ ابو حمید ساعدی (رض) دس صحابہ کرام (رض) میں تشریف فرما تھے، جن میں ابوقتادہ (رض) بھی تھے، ابوحمید (رض) نے فرمایا : رسول اللہ (صلی اللہ علیہ وآلہ وسلم) کی نماز کے متعلق میں تم سب سے زیادہ جانتا ہوں۔۔۔ اس میں یہ بھی ہے کہ آپ جب آخری رکعت میں ہوتے تو بائیں پاؤں کو (سرین کے نیچے سے دائیں طرف) نکال کر بائیں کولہے پر بیٹھ جاتے تو سب نے کہا کہ آپ نے سچ کہا، رسول اللہ (صلی اللہ علیہ وآلہ وسلم) واقعی اسی طرح نماز پڑھتے تھے۔
(ب) یہ حدیث آخری تشہد کے بارے میں واضح ہے۔ اس میں پہلے تشہد میں بیٹھنے کی کیفیت کا بیان نہیں ہے۔ ان دونوں کو ابن حلحلہ نے محمد بن عمرو سے اکٹھے حفظ کیا ہے۔
(ج) ابوجو زا کی حدیث میں ہے کہ سیدہ عائشہ (رض) سے نبی (صلی اللہ علیہ وآلہ وسلم) کی نماز کے بارے میں منقول ہے کہ آپ (صلی اللہ علیہ وآلہ وسلم) دو رکعتوں کے بعد تشہد پڑھتے تھے اور اپنے بائیں پاؤں کو بچھاتے اور دائیں کو کھڑا رکھتے اور آپ (صلی اللہ علیہ وآلہ وسلم) شیطان کی طرح بیٹھنے سے منع فرماتے تھے۔
(د) وائل بن حجر کی حدیث جو نبی (صلی اللہ علیہ وآلہ وسلم) کی نماز کے بارے میں ہے کہ پھر آپ بیٹھے اور اپنی بائیں ٹانگ کو بچھا لیا۔
(ہ) ان میں سے ایک دوسرے تشہد کے بارے میں وارد ہے اور دوسری پہلے تشہد کے بارے میں منقول ہے۔ ابوحمید ساعدی اور دیگر صحابہ (رض) کی حدیث سے استدلال کرتے ہوئے (یہی سمجھ آتا ہے) ۔