(٢٨٣٩) (ا) عبدالرحمن بن عبدالقاری فرماتے ہیں کہ میں سیدنا عمر بن خطاب (رض) کی خدمت میں حاضر ہوا، آپ منبر رسول پر لوگوں کو تشہد سکھا رہے تھے۔ آپ نے فرمایا : التحیات ۔۔۔ ” تمام قولی ، فعلی اور مالی عبادات اللہ کے لیے ہیں، اے نبی ! آپ پر سلامتی ہو اور اللہ کی رحمت اور برکتیں نازل ہوں سلام ہو ہم پر اور اللہ کے نیک بندوں پر۔ میں گواہی دیتا ہوں کہ اللہ کے سوا کوئی معبود نہیں اور میں گواہی دیتا ہوں کہ محمد (صلی اللہ علیہ وآلہ وسلم) اللہ کے بندے اور اس کے رسول ہیں۔ “
(ب) زہری سے روایت ہے کہ حضرت عمر (رض) منبر رسول پر لوگوں کو تشہد سکھلا رہے تھے اور رسول اللہ (صلی اللہ علیہ وآلہ وسلم) کے صحابہ بڑی تعداد میں موجود تھے، لیکن صحابہ آپ (رض) کی کسی بات کا انکار نہیں کر رہے تھے۔
(ج) امام بیہقی فرماتے ہیں کہ سیدہ عائشہ (رض) سے منقول دو روایتوں میں سے ایک میں شہادت کے کلمات، سلام سے مقدم ہیں۔