(٣٩٠٥) (ا) ابوہریرہ (رض) روایت کرتے ہیں کہ رسول اللہ (صلی اللہ علیہ وآلہ وسلم) نے ہمیں زوال کے بعد کی نمازوں میں سے کوئی نماز ظہر یا عصر پڑھائی، لیکن ہمیں دو رکعتیں پڑھائیں، پھر سلام پھیر دیا اور آپ (صلی اللہ علیہ وآلہ وسلم) کھڑے ہوگئے اور اپنے ہاتھ لکڑی کے اوپر رکھ دیے۔ غصہ آپ (صلی اللہ علیہ وآلہ وسلم) کے چہرے سے عیاں تھا۔ جلدی نکلنے والے لوگ یہ کہتے ہوئے نکل کھڑے ہوئے کہ نماز کم ہوگئی، نماز کم ہوگئی۔ لوگوں میں ابوبکر و عمر (رض) بھی تھے لیکن وہ دونوں بھی بات کرنے سے گھبرا گئے۔ ایک شخص کھڑا ہوا جسے رسول اللہ (صلی اللہ علیہ وآلہ وسلم) ذوالیدین (رض) کے نام سے پکارا کرتے تھے ، اس نے عرض کیا : اے اللہ کے رسول ! کیا آپ بھول گئے ہیں یا کہ نماز کم ہوگئی ہے ؟ آپ (صلی اللہ علیہ وآلہ وسلم) نے فرمایا : نہ میں بھول گیا ہوں اور نہ نماز کم ہوئی ہے۔ اس نے کہا : نہیں آپ بھول گئے ہیں۔ رسول اللہ (صلی اللہ علیہ وآلہ وسلم) لوگوں کی طرف متوجہ ہوئے اور فرمایا : کیا ذوالیدین (رض) ٹھیک کہہ رہا ہے ؟ لوگوں نے اشارہ کیا : جی ہاں تو رسول اللہ (صلی اللہ علیہ وآلہ وسلم) اپنی جگہ واپس تشریف لائے باقی دو رکعتیں پڑھائیں پھر سلام پھیر کر تکبیر کہی اور اپنے معمول کے سجدوں جیسا یا ان سے کچھ لمبا سجدہ کیا ، پھر سر اٹھایا اور تکبیر کہہ کر ویسا ہی سجدہ کیا پھر سر اٹھایا اور تکبیر کہی۔
(ب) راوی بیان کرتے ہیں کہ محمد بن سیرین سے کسی نے پوچھا : کیا سجدہ سہو کے بعد آپ (صلی اللہ علیہ وآلہ وسلم) نے سلام پھیرا ؟ انھوں نے کہا : ابوہریرہ (رض) سے تو مجھے یاد نہیں لیکن مجھے بتایا گیا کہ عمران بن حصین (رض) نے کہا کہ آپ (صلی اللہ علیہ وآلہ وسلم) نے سلام پھیرا۔