(٣٩٢٥) حمیدی اس مسئلہ کو ذکر کرتے ہوئے فرماتے ہیں کہ ابن مسعود (رض) کی حدیث کو قصداً پر محمول کیا جائے گا۔ اگر کوئی کہے کہ اس پر کیا دلیل ہے کہ اس کا ظاہر عمد، نسیان اور جہالت پر ہے ؟ ہم جواباً عرض کریں گے کہ آپ سچ کہتے ہیں : یہ ظاہر ہے، لیکن ابن مسعود (رض) کا ارض حبشہ سے واپسی کا واقعہ بدر سے پہلے کا ہے۔ اس قول کے مطابق وہ بدر میں رسول اللہ (صلی اللہ علیہ وآلہ وسلم) کے ساتھ شریک بھی ہوئے تھے، جب ابوہریرہ (رض) اسلام لائے تو اس وقت نبی (صلی اللہ علیہ وآلہ وسلم) خیبر میں تھے اور وہ رسول اللہ (صلی اللہ علیہ وآلہ وسلم) کی وفات سے تین سال پہلے اسلام لائے تھے۔ رسول اللہ (صلی اللہ علیہ وآلہ وسلم) کی نماز اور ذی الیدین (رض) کے قول کے وقت موجود تھے۔ ہم نے عمران بن حصین (رض) کو پایا کہ وہ رسول اللہ (صلی اللہ علیہ وآلہ وسلم) کی نماز اور خرباق کے قول کے وقت دوسرے موقع پر موجود تھے اور عمران (رض) بھی بدر کے بعد اسلام لائے تھے۔ معاویہ بن حدیج (رض) کے بارے میں ہمیں یہ معلومات ملی ہیں کہ ان کے سامنے رسول اللہ (صلی اللہ علیہ وآلہ وسلم) کی نماز اور طلحہ بن عبیداللہ (رض) کا واقعہ پیش آیا اور معاویہ بن حدیج (رض) رسول اللہ (صلی اللہ علیہ وآلہ وسلم) کی وفات سے صرف دو ماہ پہلے مسلمان ہوئے تھے۔ ابن عباس (رض) کو ہم نے پایا، وہ ابن زبیر (رض) کی بات کو درست قرار دے رہے ہیں اور یہ بھی بیان کرتے ہیں کہ یہ رسول اللہ (صلی اللہ علیہ وآلہ وسلم) کی سنت ہے اور ابن عباس (رض) رسول اللہ (صلی اللہ علیہ وآلہ وسلم) کی وفات کے وقت تقریباً دس سال کے تھے اور ابن عمر (رض) کو بھی ہم اسی طرح پاتے ہیں، رسول اللہ (صلی اللہ علیہ وآلہ وسلم) نے انھیں بدر کے بعد خندق میں جانے اجازت دی تھی۔ ہمیں پتا چل گیا کہ ابن مسعود (رض) کی حدیث کو نسیان سے ہٹا کر قصدا پر محمول کیا جائے گا اور اگر یہ حدیث اس وقت نسیان اور عمد (دونوں) کے لیے ہوتی تو بھی رسول اللہ (صلی اللہ علیہ وآلہ وسلم) کی بعد والی نمازیں اس قول کے لیے ناسخ ہوں گی؛ کیونکہ یہ بعد والی ہیں۔