(٣٩٢٨) شعیث اپنے والد مطیر سے کہتے ہیں : اے والد محترم ! آپ نے مجھے بتایا تھا کہ ذوالیدین (رض) آپ کو ذی حشب مقام پر ملے تھے اور انھوں نے آپ کو خبر دی تھی کہ رسول اللہ (صلی اللہ علیہ وآلہ وسلم) نے انھیں زوال آفتاب کے بعد والی نمازوں میں سے ایک نماز پڑھائی اور وہ عصر کی نماز تھی اور آپ (صلی اللہ علیہ وآلہ وسلم) نے دو رکعتوں کے بعد سلام پھیر دیا۔ پھر رسول اللہ (صلی اللہ علیہ وآلہ وسلم) کھڑے ہوئے تو ابوبکر و عمر (رض) بھی ان کے پیچھے چل پڑے۔ جلدی کرنے والے لوگ نکل گئے تو ذوالیدین ‘ ابوبکر اور عمر (رض) رسول اللہ (صلی اللہ علیہ وآلہ وسلم) کو جا ملے۔ ذوالیدین (رض) نے کہا : اے اللہ کے رسول ! کیا نماز کم ہوگئی ہے یا آپ بھول گئے ہیں ؟ رسول اللہ (صلی اللہ علیہ وآلہ وسلم) نے فرمایا : نہ نماز کم ہوئی اور نہ ہی میں بھولا ہوں۔ پھر رسول اللہ (صلی اللہ علیہ وآلہ وسلم) نے ابوبکر اور عمر (رض) کی طرف متوجہ ہو کر فرمایا : ذوالیدین کیا کہہ رہا ہے ؟ ان دونوں نے کہا : اے اللہ کے رسول ! یہ سچ کہہ رہا ہے۔ آپ (صلی اللہ علیہ وآلہ وسلم) واپس پلٹے اور لوگ پھیل چکے تھے، رسول اللہ (صلی اللہ علیہ وآلہ وسلم) نے دو رکعتیں پڑھائیں پھر سہو کے دو سجدے کیے۔