(٣٩٢٧) (ا) عروہ (رض) بیان کرتے ہیں : رسول اللہ (صلی اللہ علیہ وآلہ وسلم) کے ساتھ جو بدر میں شریک ہوئے تھے ان میں ذو الشمالین عبد عمرو بن نفلہ بن غبستان (رض) قبیلہ بنو خزاعہ سے بھی تھے اور بدر کے روز جو مسلمان شہید ہوئے ان میں بنو زہرہ بن کلام کے بھی دو مرد شہید ہوئے۔ ان میں سے ایک عمیر بن ابی وقاص (رض) اور دوسرے ذو الشمالین بن عبد عمرو بن نفلہ (رض) تھے جو خزاعہ کے بنو غبستان میں سے تھے۔
(ب) امام بیہقی (رح) فرماتے ہیں : رہے وہ ذوالیدین (رض) جنہوں نے نبی (صلی اللہ علیہ وآلہ وسلم) کو آپ کے بھولنے کے بارے میں بتایا تھا تو یہ رسول اللہ (صلی اللہ علیہ وآلہ وسلم) کی وفات کے بعد بھی زندہ رہے۔ ہمارے شیخ ابو عبداللہ الحافظ نے اسی طرح ذکر کیا اور دلیل بھی دی ہے۔