(٣٩٩٢) (ا) ابو عبید (رض) فرماتے ہیں : آپ (صلی اللہ علیہ وآلہ وسلم) کے فرمان سات حروف سے عرب کی سات لغتیں مراد ہیں ، اس کا یہ معنیٰ نہیں ہے کہ ایک ہی حرف میں سات اعراب جائز ہیں۔ اس قسم کا قول تو کسی سے کبھی بھی نہیں سنا گیا۔ لیکن وہ فرماتے ہیں کہ یہ سات لغتیں قرآن میں متفرق ہیں۔ قرآن کا بعض حصہ قریش کی لغت میں نازل ہوا، بعض ہوازن کی لغت پر، کچھ ہذیل کی لغت پر اور کچھ اہل یمن کی لغت پر نازل ہوا۔ اسی طرح دیگر لغات ہیں۔ ان کے معانی ایک ہی ہیں۔ اس کی وضاحت ابن مسعود (رض) کے مذکورہ بالا قول سے ہوئی ہے۔
(ب) اسی طرح ابن سیرین (رح) فرماتے ہیں کہ یہ تو تمہارے اس قول کی طرح ہے : ہَلُمَّ وَتَعَالَ وَأَقْبِلْ ۔ پھر ابن سیرین نے اس کی تفسیر بیان کی کہ ابن مسعود (رض) کی قرات میں ہے : ”إِنْ کَانَتْ إِلاَّ زَقْیَۃً وَاحِدَۃً ۔ “ اور ہماری قرات میں ہے : { صَیْحَۃٌ وَاحِدَۃٌ} [یس : ٢٩] ہے اور ان دونوں کا مفہوم ایک ہی ہے، اسی طرح دیگر لغات ہیں۔