(٤٣٨٥) عمرو بن عبسہ فرماتے ہیں کہ میں زمانہ جاہلیت میں تمام لوگوں کو گمراہ خیال کرتا تھا کہ وہ کسی دین پر نہیں تھے اور بتوں کے پجاری تھے ۔ میں نے مکہ میں ایک شخص کے متعلق خبریں سن رکھی تھیں، میں اپنی سواری پر مکہ آیا اور رسول اللہ (صلی اللہ علیہ وآلہ وسلم) چھپے ہوئے تھے، لوگ آپ (صلی اللہ علیہ وآلہ وسلم) کی گستاخی کرتے تھے۔ مجھے آپ (صلی اللہ علیہ وآلہ وسلم) پر ترس آیا، میں مکہ میں داخل ہوا اور میں نے پوچھا : آپ کون ہیں ؟ آپ (صلی اللہ علیہ وآلہ وسلم) نے فرمایا : میں نبی ہوں۔ میں نے کہا : کس نے آپ کو نبی بنایا ہے۔ آپ (صلی اللہ علیہ وآلہ وسلم) نے فرمایا : اللہ نے مجھے نبی بنا کر بھیجا ہے۔ میں نے کہا : کیا چیز دے کر اللہ نے آپ کو مبعوث کیا ہے ؟ آپ (صلی اللہ علیہ وآلہ وسلم) نے فرمایا : صلہ رحمی اور بتوں کو توڑنا۔ اکیلے اللہ کو ماننا، اس کے ساتھ کسی کو شریک نہیں کرنا۔ میں نے آپ (صلی اللہ علیہ وآلہ وسلم) سے کہا : اس دین پر آپ (صلی اللہ علیہ وآلہ وسلم) کے ساتھ اور کون ہے ؟ آپ (صلی اللہ علیہ وآلہ وسلم) نے فرمایا : آزاد اور غلام۔ عمرو بن عبسہ کہتے ہیں : اس دن آپ (صلی اللہ علیہ وآلہ وسلم) پر ابوبکر (رض) اور بلال (رض) ایمان لائے تھے۔ میں نے کہا : میں بھی آپ کی پیروی کرنے والا ہوں۔ آپ (صلی اللہ علیہ وآلہ وسلم) نے فرمایا : تو ابھی اس کی طاقت نہیں رکھتا۔ کیا تو دیکھتا نہیں کہ میرا اور لوگوں کا کیا حال ہے۔ تم اپنے گھر واپس لوٹ جاؤ۔ جب آپ سنیں کہ میں نے غلبہ پا لیا ہے تو میرے پاس آجانا۔ میں گھر واپس پلٹ آیا اور نبی (صلی اللہ علیہ وآلہ وسلم) مدینہ آئے اور میں اپنے گھر میں ہی لوگوں سے خبریں پوچھتا رہتا تھا، یہاں تک کہ مدینہ والوں کا ایک گروہ آیا۔ میں نے کہا : اس شخص نے کیا کیا ہے جو مدینہ میں آیا ہے ؟ انھوں نے کہا : لوگ اس کی طرف جلدی کر رہے ہیں اور اس کی قوم نے اس کو قتل کرنا چاہا لیکن وہ اس کی طاقت نہ پا سکے ہیں، پھر میں مدینہ آپ (صلی اللہ علیہ وآلہ وسلم) کے پاس آیا اور میں نے کہا : اے اللہ کے رسول ! کیا آپ مجھے پہنچانتے ہیں ؟ آپ (صلی اللہ علیہ وآلہ وسلم) نے فرمایا : کیا تو وہی نہیں جو مجھے مکہ میں ملا تھا۔ میں نے کہا : آپ مجھے اس کی چیز کی خبر دیں جو میں نہیں جانتا اور آپ کو اللہ نے سکھائی ہیں، مجھے نماز کے متعلق بتائیں، آپ (صلی اللہ علیہ وآلہ وسلم) نے فرمایا : صبح کی نماز پڑھ، پھر سورج کے طلوع ہونے تک نماز سے رک جا یہاں تک کہ سورج بلند ہوجائے۔ جب سورج طلوع ہوتا ہے تو وہ شیطان کے دو سینگوں کے درمیان سے طلوع ہوتا ہے اور اس وقت کفار اس کو سجدہ کرتے ہیں، پھر نماز پڑھ، جس میں فرشتے حاضر ہوتے ہیں، یہاں تک کہ سایہ ایک نیزے کے برابر ہوجائے، پھر نماز سے رک جا کیونکہ اس وقت جہنم کو بھڑکایا جاتا ہے۔ جب سایہ بڑھ جائے تو نماز پڑھ، یہ بھی ایسی نماز ہے جس میں فرشتے حاضر ہوتے ہیں یہاں تک کہ عصر کی نماز پڑھے۔ پھر تو نماز سے رک جا یہاں تک کہ سورج غروب ہوجائے کیونکہ سورج شیطان کے دو سینگوں کے درمیان طلوع ہوتا اور کفار اسے سجدہ کرتے ہیں۔ میں نے کہا : اے اللہ کے نبی ! مجھے وضو کے بارے میں بتائیں تو آپ (صلی اللہ علیہ وآلہ وسلم) نے فرمایا : جو آدمی ہمیشہ باوضو رہتا ہے اور وہ کلی کرتا ہے، ناک میں پانی چڑھانے کے بعد ناک جھاڑتا ہے تو اس کی ناک، چہرے اور داڑھی کے گناہ پانی کے ساتھ بہہ جاتے ہیں، پھر وہ اپنے ہاتھوں کو کہنیوں سمیت دھوتا ہے تو اس کے ہاتھوں کی انگلیوں کے پوروں سے بھی خطائیں جھڑ جاتی ہیں، پھر وہ اپنے سر کا مسح کرتا ہے تو مسح کرنے کی وجہ سے اس کے بالوں سے پانی کے ذریعہ گناہ مٹ جاتے ہیں، پھر وہ پاؤں کو ٹخنوں سمیت دھوتا ہے تو اس کے پاؤں کی انگلیوں کے پوروں سے خطائیں بہہ جاتی ہیں، پھر وہ کھڑا ہو کر نماز میں اللہ کی حمدو ثنا اور تمجید بیان کرتا ہے جس کے وہ لائق ہے اور اپنے دل کو اللہ کے لیے فارغ کرلیتا ہے تو وہ اپنی غلطیوں سے اس طرح صاف ہوجاتا ہے جس طرح کہ اس کی ماں نے اس کو آج ہی جنم دیا ہے۔ عامر بن البزہ نے یہ حدیث ابو امامہ (رض) کو بیان کی تو وہ کہنے لگے : دیکھو تم ایک ہی جگہ یہ کہہ رہے ہو کہ آدمی کو یہ کچھ دیا جائے گا۔ عمرو کہنے لگے : اے ابوامامہ ! میری عمر بڑھ گئی۔ میری ہڈیاں کمزور ہوگئیں، میری موت قریب آگئی، مجھے کیا ضرورت ہے کہ میں اللہ اور اس کے رسول (صلی اللہ علیہ وآلہ وسلم) پر جھوٹ باندھوں۔ اگر میں نے آپ (صلی اللہ علیہ وآلہ وسلم) سے ایک، دو ، نہیں بلکہ سات بار تک نہ سنا ہوتا تو میں کبھی بیان نہ کرتا۔ میں نے یہ حدیث نبی (صلی اللہ علیہ وآلہ وسلم) سے بہت مرتبہ سنی ہے۔
(ب) نضر بن محمد نے کچھ الفاظ زائد ذکر کیے ہیں کہ جب انسان پانی سے ناک جھاڑتا ہے تو اس کے ناک اور چہرے کی ساری غلطیاں پانی کے ساتھ نکل جاتی ہیں، پھر جب وہ حکم الٰہی کے ساتھ چہرہ دھوتا ہے تو اس کی خطائیں چہرے اور داڑھی کے اطراف سے نکل جاتی ہیں۔