(٥٠٧٧) عبداللہ بن عتبہ فرماتے ہیں کہ میں عائشہ (رض) کے پاس آیا، میں نے کہا : کیا آپ مجھے نبی (صلی اللہ علیہ وآلہ وسلم) کی بیماری کے بارے میں بیان کریں گی ؟ فرمایا : کیوں نہیں ! پھر انھوں نے لمبی حدیث بیان کی۔ فرماتی ہیں کہ رسول اللہ (صلی اللہ علیہ وآلہ وسلم) نے ابوبکر کو پیغام بھیجا کہ لوگوں کو نماز پڑھا دیں۔ قاصد آیا اور اس نے کہا : رسول اللہ (صلی اللہ علیہ وآلہ وسلم) آپ کو حکم دے رہے ہیں کہ آپ لوگوں کو نماز پڑھا دیں۔ ابوبکر (رض) کہنے لگے : ” وہ نرم دل تھے “ اے عمر ! لوگوں کو نماز پڑھا دو ۔ انھوں نے فرمایا : آپ اس کے زیادہ حق دار ہیں۔ ابوبکر (رض) نے ان ایام میں لوگوں کو امامت کروائی، پھر نبی (صلی اللہ علیہ وآلہ وسلم) نے کچھ راحت محسوس کی تو دو آدمیوں کے سہارے نماز ظہر کے لیے تشریف لائے، ایک عباس تھے اور ابوبکر نماز پڑھا رہے تھے۔ جب ابوبکر (رض) نے آپ (صلی اللہ علیہ وآلہ وسلم) کو دیکھا تو پیچھے ہٹے، نبی (صلی اللہ علیہ وآلہ وسلم) نے ان کی طرف اشارہ کیا کہ پیچھے نہ ہٹیں اور نبی (صلی اللہ علیہ وآلہ وسلم) نے ان دونوں سے کہا کہ مجھے ان کے پہلو میں بٹھا دو تو ان دونوں نے آپ (صلی اللہ علیہ وآلہ وسلم) کو ابوبکر کے پہلو میں بیٹھا دیا۔ فرماتی ہیں کہ لوگ ابوبکر (رض) کی اقتدا میں نماز پڑھ رہے تھے اور ابوبکر (رض) رسول اللہ (صلی اللہ علیہ وآلہ وسلم) کی اقتدا میں نماز ادا کر رہے تھے اور رسول اللہ بیٹھے ہوئے تھے۔
عبیداللہ بن عبداللہ فرماتے ہیں کہ میں عبداللہ بن عباس (رض) کے پاس آیا، میں نے کہا : میں آپ کے سامنے وہ بیان کروں جو عائشہ (رض) نے نبی (صلی اللہ علیہ وآلہ وسلم) کی بیماری کے متعلق بیان کیا، فرمایا : بیان کرو میں نے ان کے سامنے بیان کیا، انھوں کچھ بھی انکار نہیں کیا۔ لیکن یہ پوچھا کہ کیا انھوں نے عباس (رض) کے ساتھ دوسرے آدمی کا تذکرہ کیا ؟ میں نے کہا : نہیں، فرمایا : وہ علی (رض) تھے۔