(٥٠٧٨) ارقم بن شرحبیل فرماتے ہیں : میں نے ابن عباس (رض) کے ساتھ مدینہ سے شام تک سفر کیا، میں نے ان سے پوچھا تو انھوں نبی (صلی اللہ علیہ وآلہ وسلم) کی بیماری کے متعلق حدیث ذکر کی کہ رسول اللہ (صلی اللہ علیہ وآلہ وسلم) نے کچھ آرام محسوس کیا تو آپ (صلی اللہ علیہ وآلہ وسلم) دو آدمیوں کے سہارے نکلے ۔ جب لوگوں نے محسوس کیا تو ” سبحان اللہ کہا : ابوبکر (رض) پیچھے ہٹنے لگے تو آپ (صلی اللہ علیہ وآلہ وسلم) نے اشارہ کیا کہ اپنی جگہ ٹھہرو۔ نبی (صلی اللہ علیہ وآلہ وسلم) نے قرآن وہاں سے شروع کیا، جہاں سے ابوبکر (رض) نے چھوڑا تھا۔ ابوبکر (رض) کھڑے تھے اور نبی (صلی اللہ علیہ وآلہ وسلم) بیٹھے ہوئے تھے۔ ابوبکر (رض) نے نبی (صلی اللہ علیہ وآلہ وسلم) کی اقتدا کی اور لوگوں نے ابوبکر (رض) کی اقتدا کی۔ جب آپ (صلی اللہ علیہ وآلہ وسلم) نے نماز پوری کی تو آپ (صلی اللہ علیہ وآلہ وسلم) کی طبیعت بوجھل ہوگئی، پھر آپ (صلی اللہ علیہ وآلہ وسلم) دو آدمیوں کے سہارے چلے اور آپ (صلی اللہ علیہ وآلہ وسلم) کے پاؤں کے ساتھ زمین پر لکیر بن رہی تھی۔ نبی (صلی اللہ علیہ وآلہ وسلم) کا انتقال ہوا لیکن آپ نے وصیت نہیں کی۔