(٥٠٧٩) عائشہ (رض) فرماتی ہیں کہ جب رسول اللہ (صلی اللہ علیہ وآلہ وسلم) کی طبیعت خراب ہوئی تو بلال آئے اور وہ نبی (صلی اللہ علیہ وآلہ وسلم) کو نماز کی اطلاع دے رہے تھے۔ آپ (صلی اللہ علیہ وآلہ وسلم) نے فرمایا : ابوبکر کو حکم دو کہ وہ لوگوں کو نماز پڑھائیں۔ میں نے کہا : اے اللہ کے رسول ! ابوبکر (رض) کمزور دل ہیں۔ جب وہ آپ (صلی اللہ علیہ وآلہ وسلم) کی جگہ کھڑے ہوں گے تو اپنی آواز لوگوں کو نہیں سنا سکیں گے۔ اگر آپ عمر (رض) کو حکم دیں۔ آپ (صلی اللہ علیہ وآلہ وسلم) نے فرمایا : ابوبکر کو حکم دو کہ وہ لوگوں کو نماز پڑھائیں۔ میں نے حفصہ سے کہا : آپ نبی (صلی اللہ علیہ وآلہ وسلم) سے یہ بات کہہ دو کہ ابوبکر نرم دل ہے۔ جب آپ (صلی اللہ علیہ وآلہ وسلم) کی جگہ کھڑے ہوں گے تو اپنی آواز لوگوں کو نہیں سنا سکیں گے ۔ اگر آپ عمر (رض) کو حکم دیں۔ انھوں نے نبی (صلی اللہ علیہ وآلہ وسلم) سے یہ بات کہہ دی تو نبی (صلی اللہ علیہ وآلہ وسلم) نے فرمایا : تم بھی یوسف کی عورتوں کی طرح ہو، ابوبکر کو حکم دو کہ وہ لوگوں کو نماز پڑھائے۔ انھوں نے ابوبکر (رض) کو حکم دیا۔ انھوں نے لوگوں کو نماز پڑھائی۔ جب ابوبکر (رض) نے نماز شروع کی تو نبی (صلی اللہ علیہ وآلہ وسلم) نے کچھ راحت محسوس کی اور آپ (صلی اللہ علیہ وآلہ وسلم) دو آدمیوں کے سہارے کھڑے ہوئے، آپ (صلی اللہ علیہ وآلہ وسلم) کے پاؤں زمین پر لگنے کی وجہ سے لکیر بنا رہے تھے۔ جب آپ (صلی اللہ علیہ وآلہ وسلم) مسجد میں داخل ہوئے اور ابوبکر (رض) نے آپ (صلی اللہ علیہ وآلہ وسلم) کے آنے کو محسوس کیا تو آپ (رض) پیچھے ہٹنے لگے، آپ (صلی اللہ علیہ وآلہ وسلم) نے اشارہ کیا کہ اپنی جگہ پر ٹھہرو۔ پھر نبی (صلی اللہ علیہ وآلہ وسلم) ، ابوبکر (رض) کی بائیں جانب بیٹھ گئے۔ فرماتی ہیں کہ نبی (صلی اللہ علیہ وآلہ وسلم) نے لوگوں کو بیٹھ کر نماز پڑھائی اور ابوبکر (رض) کھڑے تھے۔ ابوبکر (رض) نبی (صلی اللہ علیہ وآلہ وسلم) کی نماز کی اقتدا کر رہے تھے اور لوگ ابوبکر (رض) کی نماز کی اقتدا کر رہے تھے۔