(٥٨٣٩) انس بن مالک (رض) فرماتے ہیں کہ نبی (صلی اللہ علیہ وآلہ وسلم) کے دور میں لوگوں کو قحط سالی کا سامنا تھا۔ نبی (صلی اللہ علیہ وآلہ وسلم) جمعہ کے دن منبر پر خطبہ ارشاد فرما رہے تھے ، ایک دیہاتی آیا : اس نے کہا : اے اللہ کے رسول ! مال تباہ ہوگئے اور لوگ بھوکے ہیں ، آپ (صلی اللہ علیہ وآلہ وسلم) اللہ سے دعا کریں تو نبی (صلی اللہ علیہ وآلہ وسلم) نے اپنے ہاتھ اٹھالیے اور ہم نے آسمان پر بادل کا ٹکڑا بھی نہیں دیکھا تھا ۔ اللہ کی قسم ! آپ (صلی اللہ علیہ وآلہ وسلم) نے ہاتھ نیچے نہیں کیے کہ آسمان پر پہاڑوں کی ماند بادل پیدا ہوگئے۔ پھر آپ (صلی اللہ علیہ وآلہ وسلم) منبر سے نہیں اترے کہ بارش شروع ہوگئی اور اس کے قطرے آپ (صلی اللہ علیہ وآلہ وسلم) کی داڑھی سے گر رہے تھے تو اس دن اور اگلے دن بارش ہوئی، اس سے اگلے دن بھی ۔ یہاں تک کہ دوسرے جمعہ تک۔ وہ دیہاتی یا کوئی دوسرا آدمی کھڑا ہوا اور کہنے لگا : اے اللہ کے رسول ! گھر گرگئے اور لوگ بھوکے رہے، آپ (صلی اللہ علیہ وآلہ وسلم) اللہ سے دعا کریں تو نبی (صلی اللہ علیہ وآلہ وسلم) نے ہاتھ اٹھائے اور فرمایا : اللہ اس کو ہم سے پھیر دے۔ راوی کہتے ہیں : آپ (صلی اللہ علیہ وآلہ وسلم) نے ہاتھ کا اشارہ کیا تو بادل بالکل صاف ہوگئے اور مدینہ بادلوں سے خالی ہوگیا اور ایک ماہ تک ندی نالے بہتے رہے اور جو بھی مدینہ کے گرد و نواح سے آتا وہ بارش کے بارے میں بیان کرتا۔