(٦٠٥٢) یزید بن صہیب فقیر فرماتے ہیں کہ میں نے جابر (رض) سے سوال کیا کہ سفر میں دو رکعتوں میں قصر ہے ؟ جابر (رض) نے فرمایا : سفر میں دو رکعت میں قصر نہیں، لیکن قتال میں ایک رکعت قصر ہے۔ پھر فرمایا کہ وہ لڑائی کے موقع پر نبی (صلی اللہ علیہ وآلہ وسلم) کے ساتھ تھے اور نماز کا وقت ہوگیا۔ نبی (صلی اللہ علیہ وآلہ وسلم) کھڑے ہوگئے تو ایک گروہ نے آپ (صلی اللہ علیہ وآلہ وسلم) کے پیچھے صف بنائی اور دوسرا گروہ دشمن کے سامنے رہا۔ آپ (صلی اللہ علیہ وآلہ وسلم) نے ان کو ایک رکعت پڑھائی اور اس میں دو سجدے کیے۔ پھر وہ لوگ جنہوں نے آپ (صلی اللہ علیہ وآلہ وسلم) کے پیچھے نماز پڑھی تھی دوسرے گروہ کی جگہ چلے گئے ۔ پھر دوسرا گروہ آیا اور انھوں نے نبی (صلی اللہ علیہ وآلہ وسلم) کے پیچھے نماز پڑھی، آپ (صلی اللہ علیہ وآلہ وسلم) نے ان کو ایک رکعت پڑھائی اور اس میں دو سجدے کیے۔ پھر نبی (صلی اللہ علیہ وآلہ وسلم) بیٹھ گئے اور سلام پھیرا۔ پھر ان لوگوں نے سلام پھیرا جو آپ (صلی اللہ علیہ وآلہ وسلم) کے پیچھے تھے اور دوسروں نے بھی ۔ رسول اللہ (صلی اللہ علیہ وآلہ وسلم) کی دو رکعت اور لوگوں کی ایک ایک رکعت ہوئی۔
پھر یزید نے یہ آیت تلاوت کی : { وَإِذَا کُنْتَ فِیہِمْ فَأَقَمْتَ لَہُمُ الصَّلاَۃَ } [النساء : ١٠٢] جب آپ (صلی اللہ علیہ وآلہ وسلم) ان میں موجود ہوں تو ان کے لیے نماز قائم کیجیے۔
شیخ فرماتے ہیں : ممکن ہے جو جابر (رض) نے بیان کیا ، یہ نبی (صلی اللہ علیہ وآلہ وسلم) کی غزوہ میں نماز ہو، اسی طرح دوسروں نے بیان کیا کہ انھوں نے ایک رکعت اپنے طور پر پڑھی۔ بہرحال اثبات کو لیا جائے گا۔