(٦٥٣٠) طلحہ بن عبید اللہ تیمی بیان کرتے ہیں کہ ” بلی “ سے دو آدمی اکٹھے آپ (صلی اللہ علیہ وآلہ وسلم) کے پاس آئے اور اکٹھے اسلام قبول کیا۔ ان میں سے ایک نیکی میں محنت کرنے والا تھا، وہ ایک مرتبہ غزوے میں شریک ہوا اور شہید ہوگیا۔ اس کے بعد دوسرا ایک سال زندہ رہا۔ پھر وہ بھی فوت ہوگیا۔ طلحہ (رض) کہتے ہیں : ایک مرتبہ خواب میں ہم جنت کے دروازے کے پاس تھے کہ میں نے دیکھا ہوں کہ میں ان دونوں کے ساتھ ہوں تو جنت میں سے ایک نکلنے والا نکلا۔ اس نے ان دونوں میں سے اسے اجازت دے دی جو بعد میں فوت ہوا تھا ۔ پھر وہ پلٹا اور اسے اجازت دی جو شہید ہوا تھا۔ پھر وہ میری طرف پلٹا اور اس نے کہا : تو پلٹ جا ابھی تیرا وقت نہیں آیا ۔ صبح ہوئی تو طلحہ (رض) نے یہ بات لوگوں کو بتائی تو لوگوں نے اس پر تعجب کیا اور یہ بات رسول اللہ (صلی اللہ علیہ وآلہ وسلم) تک پہنچی تو آپ (صلی اللہ علیہ وآلہ وسلم) نے فرمایا : کس بات پر تم تعجب کرتے ہو ؟ انھوں نے کہا : اے اللہ کے رسول ! یہ ان دونوں میں سے زیادہ محنت کرنے والا تھا اور پھر وہ اللہ تعالیٰ کی راہ میں شہید بھی ہوا مگر جنت میں بعد میں داخل ہوا اور بعد میں جانے والا پہلے داخل ہوا تو آپ (صلی اللہ علیہ وآلہ وسلم) نے فرمایاـ: ــکیا وہ اس کے بعد ایک سال زندہ نہیں رہا اور اس نے رمضان کا مہینہ پایا اس کے روزے رکھے تو انھوں نے کہا : کیوں نہیں اور سال میں اس نے کتنے سجدے کیے تو انھوں نے کہا : کیوں نہیں تو آپ (صلی اللہ علیہ وآلہ وسلم) نے فرمایا : تب تو ان کے درمیان آسمان و زمین کی دوری پیدا ہوگئی (اجر میں) ۔