(٧٩٩٥) ابوہریرہ (رض) فرماتے ہیں کہ جس نے صبح جنبی حالت میں کی تو وہ اس دن افطار کرے تو مروان نے کہا : اے عبدالرحمن ! میں تجھے قسم دیتا ہوں کہ تو میرے ساتھ اُم المومنین عائشہ (رض) کے پاس جائے گا اور ام المومنین اُم سلمہ (رض) کے پاس بھی۔ ابوبکر کہتے ہیں کہ پھر عبدالرحمن گیا اور میں اس کے ساتھ تھا یہاں تک کہ ہم سیدہ عائشہ (رض) کے پاس آگئے تو عبدالرحمن نے سلام پیش کیا اور کہا : اے اُم المومنین ! ہم مروان کے پاس تھے اور تمام بات بیان کی گئی کہ ابوہریرہ (رض) نے کہا : جس نے صبح جنبی حالت میں کی تو وہ اس دن افطار کرے تو سیدہ عائشہ (رض) نے کہا : ایسے نہیں ہے جیسے ابوہریرہ (رض) نے کہا ہے، اے عبدالرحمن ! کیا تم اس سے بےرغبتی کرتے ہو جو رسول اللہ (صلی اللہ علیہ وآلہ وسلم) نے فرمایا ؟ تو عبدالرحمن نے کہا : نہیں اللہ کی قسم یہ بات نہیں ہے تو سیدہ عائشہ (رض) نے فرمایا کہ میں گواہی دیتی ہوں کہ رسول اللہ (صلی اللہ علیہ وآلہ وسلم) صبح جنبی حالت میں کرتے بغیر احتلام کے جماع کے ساتھ۔ پھر اس دن کا روزہ رکھتے تھے ۔ پھر ہم نکلے اور سیدہ اُم سلمہ (رض) کے پاس گئے اور ان سے پوچھا تو انھوں نے بھی وہی کچھ کہا جو سیدہ عائشہ (رض) نے کہا تھا، پھر ہم مروان کے پاس آئے اور عبدالرحمن نے کہا : میں تجھے قسم دیتا ہوں کہ تو میری سواری پر سوار ہو کر میرے ساتھ ابوہریرہ (رض) کے پاس چلے گا۔ پھر عبدالرحمن سوار ہوا اور میں بھی سوار ہوا ہم ابوہریرہ (رض) کے پاس آئے پھر عبدالرحمن نے ان کے ساتھ کچھ دیر تک گفتکو کی۔ پھر یہ بات ابوہریرہ (رض) کو بتائی تو ابوہریرہ (رض) نے کہا : مجھے اس بات کا کوئی علم نہیں، مجھے تو بتانے والے نے بتایا ہے۔