(٨٠٠٦) ابو امامہ باہلی (رض) فرماتے ہیں کہ میں نے رسول اللہ (صلی اللہ علیہ وآلہ وسلم) سے سنا کہ ایک دفعہ میں سو رہا تھا تو میرے پاس دو آدمی آئے اور انھوں نے مجھے کندھوں سے پکڑا اور جبل احد پر لے آئے اور مجھ سے کہنے لگے : اس پر چڑھ ، میں نے کہا : میں اس پر چڑھنے کی طاقت نہیں رکھتاہوں ۔ انھوں نے کہا : ہم آپ کے لیے اس کو آسان کردیں گے تو میں اس پر چڑھا حتیٰ کہ جب میں پہاڑپر آیا تو میں نے شدید آوازیں سنیں تو میں نے کہا : یہ آوازیں کیسی ہیں ؟ انھوں نے کہا : یہ جہنمیوں کی چیخ و پکار ہے۔ پھر مجھے آگے لے جایا گیا یہاں تک کہ میں ایک ایسی قوم کے پاس تھا جو اُلٹے لٹکائے ہوئے تھے اور ان کی باچھیں چیری ہوئی تھیں اور ان سے خون بہہ رہا تھا۔ میں نے کہا : یہ کون لوگ ہیں ؟ تو انھوں نے کہا : یہ وہ لوگ ہیں جو افطار کے جائز ہونے سے پہلے افطار کرلیتے تھے۔