(٨٩٧٩) سعید بن جبیر فرماتے ہیں کہ میں نے عبداللہ بن عباس کو کہا : اے ابوالعباس ! مجھے صحابہ کرام (رض) کے نبی (صلی اللہ علیہ وآلہ وسلم) کے تلبیہ کے بارے میں اختلاف پر تعجب ہے تو وہ کہنے لگے : میں لوگوں میں سے اس کو زیادہ جانتا ہوں، رسول اللہ (صلی اللہ علیہ وآلہ وسلم) نے صرف ایک ہی حج کیا اور وہیں سے انھوں نے اختلاف کیا ۔ رسول اللہ (صلی اللہ علیہ وآلہ وسلم) حج کی غرض سے نکلے ۔ جب مسجد ذوالحلیفہ میں دو رکعتیں پڑھیں تو وہیں سے حج کا تلبیہ کہنا شروع کردیا، جب دو رکعتوں سے فارغ ہوئے تو کچھ لوگوں نے اس بات کو یاد کرلیا۔ پھر سوار ہوئے اور جب آپ کی اونٹنی آپ کو لے کر اٹھی تو آپ نے تلبیہ کہا تو کچھ لوگوں نے آپ کو اس وقت تلبیہ کہتے ہوئے پایا اور یہ اس وجہ سے کہ لوگ گروہ در گروہ آئے تھے تو انھوں نے اس وقت آپ کو تلبیہ کہتے سنا، جب آپ کو اونٹنی لے کر اٹھی تو انھوں نے کہا کہ رسول اللہ (صلی اللہ علیہ وآلہ وسلم) نے اس وقت تلبیہ کہا ، جب آپ کی اونٹنی آپ کو لے کر اٹھی، پھر آپ (صلی اللہ علیہ وآلہ وسلم) آگے بڑھے اور جب بیداء پر چڑھے تو تلبیہ کہا اور اس وقت بھی کچھ لوگوں نے آپ کو پایا تو انھوں نے سمجھا کہ رسول اللہ (صلی اللہ علیہ وآلہ وسلم) نے اس وقت تلبیہ کا آغاز کیا جب بیداء کی بلندی پر چڑھے اور اللہ کی قسم ! آپ نے اپنی نماز والی جگہ سے ہی تلبیہ شروع کرلیا تھا اور جب آپ کی اونٹنی آپ کو لے کر اٹھی اور جب آپ (صلی اللہ علیہ وآلہ وسلم) شرف بیداء پر چڑھے، سعید بن جبیر (رض) فرماتے ہیں کہ جس نے ابن عباس (رض) کے قول کو لیا اس نے اسی وقت تلبیہ کہا جب وہ نماز پڑھ کر فارغ ہوا۔