Sunan Al Daraqutni: Hadith 1173

1173 ۔ اسماعیل بن عبید اپنے والد کے حوالے سے اپنا دادا کا یہ بیان نقل کرتے ہیں : حضرت معاویہ بن ابوسفیان (رض) حج یا عمرہ کرنے کے لیے مدینہ منورہ تشریف لائے انھوں نے لوگوں کو نماز پڑھاتے ہوئے قرات کے آغاز میں (بلند آواز میں) بسم اللہ الرحمن الرحیم نہیں پڑھی اور سورة فاتحہ پڑھنی شروع کردی ، جب انھوں نے نماز مکمل کرلی تو مہاجرین اور انصار مسجد کے مختلف گوشوں سے اٹھ کر ان کے پاس آئے اور بولے : اے معاویہ ! آپ نے بسم اللہ الرحمن الرحیم جان بوجھ کر ترک کی ہے یا اسے پڑھنا بھول گئے تھے۔
(راوی بیان کرتے ہیں : جب حضرت معاویہ (رض) نے ان لوگوں کو اگلی نماز پڑھائی تو اس میں بلند آواز سے بسم اللہ الرحمن الرحیم پڑھی) ۔
امام دار قطنی رحمہ اللہ بیان کرتے ہیں نبی کریم (صلی اللہ علیہ وآلہ وسلم) کے بلند آواز میں بسم اللہ الرحمن الرحیم پڑھنے کے بارے میں جو روایات ہم نے نقل کی ہیں ان کے علاوہ بعض دیگر صحابہ نے اور ازواج مطہرات نے بھی یہ بات نقل کی ہے۔ ہم نے بلند آواز میں بسم اللہ الرحمن الرحیم پڑھنے کے مسئلے میں ان روایات کو الگ طور پر اکٹھا کیا ہے یہاں ہم نے اختصار کے ساتھ وہ روایات نقل کی ہیں جو پہلے گزر گئی تھیں تاکہ اختصار اور تلیخیص موجود رہے۔ اسی طرح ہم نے اس مقام پر وہ روایات بھی نقل کی ہیں جو یہ واضح کرتی ہیں نبی کریم (صلی اللہ علیہ وآلہ وسلم) کے اصحاب تابعین اور ان کے بعد آنے والے اہل علم میں سے کون سے حضرات بلند آواز میں بسم اللہ الرحمن الرحیم پڑھا کرتے تھے۔