Sunan Al Daraqutni: Hadith 1181

1181 ۔ حضرت عبداللہ بن ابواوفی (رض) بیان کرتے ہیں : ایک شخص نبی کریم (صلی اللہ علیہ وآلہ وسلم) کی خدمت میں حاضر ہوا اس نے اس بات کا تذکرہ کیا کہ وہ قرآن مجید کو یاد نہیں کرسکتا۔
ابن عیینہ نامی راوی نے یہ الفاظ نقل کیے ہیں : اس نے عرض کیا یارسول اللہ آپ (صلی اللہ علیہ وآلہ وسلم) مجھے ایسی چیز کی تعلیم دیں جو میرے لیے قرآن کی جگہ ہو کیونکہ میں قرات نہیں کرسکتا، تو نبی کریم (صلی اللہ علیہ وآلہ وسلم) نے ارشاد فرمایا تم یہ دعا پڑھو۔
'' اللہ تعالیٰ پاک ہے ہر طرح کی حمد اللہ کے لیے مخصوص ہے اور اللہ کے علاوہ کوئی معبود نہیں ہے اللہ سب سے بڑا ہے اور اللہ کی مدد کے بغیر کچھ نہیں ہوسکتا۔
راوی بیان کرتے ہیں : اس نے اپنی انگلیاں بند کرکے (ان کلمات کو یاد کیا) اور پھر بولا یہ تو میرے پروردگار کی تعریف کے لیے ہے میرے لیے (دعا کے طور پر) کیا ہوگا ؟ تو نبی کریم (صلی اللہ علیہ وآلہ وسلم) نے ارشاد فرمایا تم یہ دعا مانگو۔
'' اے اللہ ! تو میری مغفرت کردے تو مجھ پر رحم کر۔ مجھے ہدایت پر ثابت قدم رکھ تو مجھے رزق عطاء کر اور تو مجھے عافیت نصیب کر۔ (راوی کہتے ہیں ) تو اس نے دوسرے ہاتھ کی انگلیاں بند کرکے (ان کلمات کو یاد کیا) اور اٹھ کر (چل دیا) ۔