Sunan Al Daraqutni: Hadith 2363

2363 ۔ حضرت ابوہریرہ (رض) بیان کرتے ہیں ، ایک شخص نے رمضان کے مہینے میں روزہ توڑ لیا تو نبی کریم (صلی اللہ علیہ وآلہ وسلم) نے اسے یہ ہدایت کی کہ وہ کفارے کے طور پر ایک غلام آزاد کرے یا دو ماہ کے روزے رکھے یاساٹھ مسکینوں کو کھانا کھلائے۔ راوی بیان کرتے ہیں ، اس شخص نے عرض کی، میرے پاس اس کی گنجائش نہیں ہے ، پھر نبی کریم (صلی اللہ علیہ وآلہ وسلم) کی کی خدمت میں کھجوروں کی ایک بوری لائی گئی تو آپ نے ارشاد فرمایا اسے لو، اور اسے صدقہ کرو، اس نے عرض کی یارسول اللہ مجھے اپنے زیادہ ان کا کوئی اور ضرورت مند نہیں معلوم ہے ، تو نبی کریم (صلی اللہ علیہ وآلہ وسلم) مسکرادیے یہاں تک کہ آپ کے اطراف کے دانت بھی ظاہر ہوئے پھر آپ نے فرمایا اسے تم کھالو۔
بعض راویوں نے اس روایت میں یہ بات نقل کی ہے اس شخص نے رمضان (کا روزہ ) توڑ دیا تھا اور کفارہ دینے کے بارے میں اسے اختیار دیا گیا تھا (کہ وہ مذکورہ بالا تین صورتوں میں سے کسی ایک کو اختیار کرلے) ۔ لیکن اکثر راویوں نے یہ بات نقل کی ہے اس شخص نے صحبت کر کے روزہ توڑا تھا، اور نبی کریم (صلی اللہ علیہ وآلہ وسلم) نے پہلے اسے غلام آزاد کرنے کے ذریعہ کفارہ ادا کرنے کا حکم دیا ، جب اس کے پاس اس کی گنجائش نہیں تھی، تو اسے دو ماہ روزے رکھنے کی ہدایت کی جب اس میں اس کی بھی استطاعت نہیں تھی تو اسے ساٹھ مسکینوں کو کھانا کھلانے کا حکم دیا۔