Sunan Al Daraqutni: Hadith 278

حضرت عثمان غنی (رض) کے بارے میں یہ بات منقول ہے، انھوں نے ایک دن وضو کا پانی منگوایا اور پھر نبی اکرم (صلی اللہ علیہ وآلہ وسلم) کے اصحاب (رض) میں سے کچھ افراد کو بلایا، پھر انھوں نے اپنے دائیں ہاتھ کے ذریعے اپنے بائیں ہاتھ پر پانی ڈالا اور اسے تین مرتبہ دھویا۔ انھوں نے تین مرتبہ کلی کی، اس کے بعد ناک میں پانی ڈالا، پھر اپنے چہرے کو تین مرتبہ دھویا، پھر دونوں بازؤ وں کو کہنیوں تک تین، تین مرتبہ دھویا، پھر انھوں نے اپنے سر کا مسح کیا، پھر انھوں نے اپنے دونوں پاؤں دھولیے اور انھیں اچھی طرح صاف کیا، پھر انھوں نے یہ بات بیان کی : میں نے نبی اکرم (صلی اللہ علیہ وآلہ وسلم) کو دیکھا، آپ نے اسی طرح وضو کیا، جیسے ابھی آپ لوگوں نے مجھے وضو کرتے ہوئے دیکھا ہے، پھر نبی اکرم (صلی اللہ علیہ وآلہ وسلم) نے یہ بات ارشاد فرمائی : ” جو شخص وضو کرے اور اچھی طرح وضو کرے، پھر اس کے بعد وہ دو رکعت نماز ادا کرے تو اپنے گناہوں کے حوالے سے وہ اس طرح ہوجاتا ہے، جیسے اس دن تھا جب اس کی ماں نے اسے جنم دیا تھا “۔