Sunan Al Daraqutni: Hadith 3004

3004 ۔ حضرت ابوسعید خدری (رض) بیان کرتے ہیں ایک مرتبہ نبی کریم (صلی اللہ علیہ وآلہ وسلم) نے ایک مہم روانہ کی جس کے امیر حضرت ابوسعید خدری (رض) تھے ان کا گزر ایک بستی پر سے ہوا جس کے امیر کو کسی زہریلے جانور نے کاٹ لیا تھا ہم نے ان لوگوں سے کھانا مانگا انھوں نے ہمیں کھانے کے لیے انکار کردیا، ہمیں پڑاؤ بھی نہیں کرنے دیا، (ہم بستی سے باہر پڑاؤ کیا) اس بستی کا ایک فرد ہمارے پاس سے گزرا توبولااے اہل عرب کیا تم میں سے کسی شخص کو دم کرنا آتا ہے ہمارے سردار مررہا ہے تو حضرت ابوسعید خدری نے فرمایا میں اس کے پاس آیا اور میں نے سورة فاتحہ پڑھ کر اس پر دم کیا تو وہ ٹھیک ہوگیا۔ ان لوگوں نے ہماری طرف کھانے کا سامان بھیجا اور بکریاں بھیجیں میں نے اور میرے ساتھیوں نے کھانا کھالیا، لیکن میرے ساتھیوں نے ان بکریوں (کو ذبح کرنے ان کا گوشت کھانے سے) انکار کردیا، یہاں تک کہ ہم نبی کریم (صلی اللہ علیہ وآلہ وسلم) کی خدمت میں حاضر ہوئے آپ کو اس بارے میں بتایا تو آپ نے دریافت کیا تمہیں کیسے پتا چلا کہ اس کا دم بھی ہوتا ہے ؟ میں نے عرض کیا یارسول اللہ یہ بات میرے ذہن میں آگئی تھی تو نبی نے فرمایا، تم ان بکریوں (کا گوشت ) کھاؤ اور اس میں سے ہمیں بھی کھلاؤ۔